Kirol Egokituko Euskal Federazioarekin martxan jarritako bikaintasun proiektuko kidea den Ibon Muguerza ere Europako txapeldun izan da bere kategoarian
Aitor Francesenak badaki zein den garaipenaren zaporea eta gaur berriz ere dastatu egin du Viana do Castelon (Portugal) jokatu duten surf egokituko Europako txapelketan nagusituta, AS VI kategorian.
Zarautzeko surflaria onena izan da finalera heldu arte jokatutako hiru txandetatik bitan; hirugarrena bigarren postuan bukatu du. Txapelketako azken 30 minutuetara, garaipena erdiesteko aukera askorekin iritsi da, beraz. Aitor oso lasai eta sendo aritu izan da finalean, eta erakutsi du prestaketa itzela egiten ari dela denboraldiko bere helburu nagusia lortzeko: berriz ere Munduko txapeldun izatea. Gaurko finalean ‘Gallo’k Gwendal Halna (16,47), Marta Jordao (7,57) eta Matteo Fancchini (4,33) menderatu ditu 19,17ko puntuazioarekin.
Aitor Francesena Munduko txapeldun izan zen 2016an, brontzezko domina erdietsi zuen 2017an eta podiumetik oso gertu geratu zen 2018an, laugarren bukatuta. Gaur beste titulu bat gehitu dio palmaresari, txapeldun kontinentalarena.
Bestalde, Ibon Muguerza, Basque Teamek Kirol Egokituko Euskal Federazioarekin martxan jarritako bikaintasun proiektuko kidea, ere Europako txapeldun izan da AS I kategorian.
Kasu honetan lehia handiko finala jokatu dute, baina finalaren erdialdera Ibonek aurrea hartu du. Azkenean, 15,83ko puntuazioarekin Camilo Abdula (13,84), Benoit Moreau (10,44) eta Phillipe Naud (12,17) gainditu ditu.
