Andy Crierek eta Joan Duruk plaza olinpikoak lortu dituzte Puerto Ricoko Munduko Surf Txapelketan
02-martxo-2024

Andy Crierek eta Joan Duruk plaza olinpikoak lortu dituzte Puerto Ricoko Munduko Surf Txapelketan

Andy Criere

Nadia Erostarbek aurrera jarraitzen du txapelketa nagusian eta Janire Gonzalez-Etxabarrik agur esan dio lehiaketari

Atzo Nadia Erostarbek eta Janire Gonzalez-Etxabarrik eskuratu zuten Teahupooko olatu mitikoan Joko Olinpikoak jokatzeko txartela eta gaur beste bi kirolarik euskal surfa Munduko Txapelketa honetan izaten ari den bide arrakastatsuaren beste kapitulu bat idatzi dute.

Andy Criere izan da Jokoetarako txartela lortzen lehena. Errepeskako 9. kanporaketan aurrera egiteari esker, oraindik kuotarik gabe jarraitzen zuten lehiaketako sei gizon onenen artean kokatzea lortu du, eta horrek, hain zuzen ere, plaza olinpikoa ziurtatzea ekarri dio.

Lankideen “¡Andy, Andy!” oihuez lagunduta, Fernando Aguerre ISAko (International Surfing Association) presidentearen eskutik jaso du Crierek Paris 2024rako kuota ziurtatzen zuen tiketa, hondartzan bertan.

“Ezin dut sinetsi. Egia bihurtutako ametsa da. Jende askok lagundu dit nagoen lekura iristen. Erronka berri bat dugu elkarrekin prestatzeko” adierazi du Donostian jaio baina Hendaian bizi den surflariak.

Crierek, gainera, lehian aurrera egiten jarraitzen du, lan bikaina biribilduz gaur, Arecibon bildutako jendearen gozamenerako. 9. errepeska igaro ondoren, gauza bera egin du 10. errepeskan, eta, beraz, oraindik aukera du lehiaketa nagusira itzultzeko.

Andyk txartela lortu ondoren, bi ordu geroago, Joan Duruk ere lortu du. Baionan jaiotako surflaria Marco Mignot taldekidearen emaitzak baldintzatzen zuen, baina 10. errepeskan erori denez, Duruk matematikoki ziurtatu du Jokoetarako txartela. Joanek bigarren postuan gainditu du lehiaketa nagusiko 6. kanporaketa eta bihar Gabriel Medina brasildarra, Kauli Vaast frantziarra eta Alonso Correa perutarra izango ditu aurkari zazpigarren kanporaketan.

Nadia Erostarbek ere munduko titulua eskuratzeko aukerekin jarraitzen du Puerto Ricon. Zarauztarrak presiorik gabe surfeatu du gaur 5. kanporaketan eta 6.era pasa da, finalaren aurreko azken txandara, non Sol Aguirre perutarra, Sally Fitzgibbons australiarra eta Johanne Defay frantziarra izango dituen aurkari.

Bestalde, Janire Gonzalez-Etxabarrik errepeskako 7. kanporaketan agur esan dio txapelketari, Camilla Kemp alemaniarraren, Tessa Thyssen frantziarraren eta Anat Lelior israeldarraren aurka galdu ostean. Dena den, Zumaiako surflariak egindako lanarekin oso pozik amaitu du  bere lehen Munduko Txapelketa absolutua.

Honekin lotutako berriak

15-azaroa-2026

Basque Teameko Janire Gonzalez-Etxabarri surflariak brontzea lortu du Punta Rocaseko Munduko Txapelketan

Informazio gehiago
15-azaroa-2026

Hans Odriozola eta Janire Gonzalez-Etxabarri Basque Teameko surflariek aukerekin ekingo diote azken jardunaldiari, oraindik Munduko Txapelketako lehiaketa nagusiaren barruan

Informazio gehiago
14-azaroa-2026

Nadia Erostarbe, Janire Gonzalez-Etxabarri eta Hans Odriozola dira Punta Rocaseko Munduko Txapelketako lehia nagusian aurrera jarraitzen duten hiru euskal surflari bakarrak

Informazio gehiago
12-azaroa-2026

Ruben Vitoria eta Kai Odriozola Basque Teameko kirolariak Punta Rocaseko Munduko Txapelketako bosgarren kanporaketarako sailkatu dira errepeskan

Informazio gehiago
12-azaroa-2026

Euskal surflari guztiek aukerekin jarraitzen dute Punta Rocaseko Munduko Txapelketan

Informazio gehiago
10-azaroa-2026

Euskal surflari guztiek jarraitzen dute lehian Punta Rocaseko Munduko Txapelketan

Informazio gehiago