Leticia Canales Basque Teameko surflaria 32 onenen kanporaketara pasa da Caparica Surf Festen
Leticia Canales
Basque Teameko beka jasotzen duen Leticia Canales surflariak 48 surflari onenen kanporaketa gainditu du. Gizonezkoen lehiaketa amaitu ondoren, emakumeek hartu dute lekukoa Portugalgo Praia do Paraison, eta Sopelako kirolariari uretan sartzea egokitu zaio bosgarren txandan. Maelys Jouault eta Nahia Milhau frantziarren eta Carolina Santos portugaldarraren aurka jokatu behar izan du. Hasieratik oso ondo kokatu da, eta berak aitortu duenez, seriearen amaieran hainbat akats egin dituen arren, hurrengo fasera 7.60ko puntuazioarekin eta 3.67 eta 3.93ko bi olatu onenekin igaro da.
Hurrengo kanporaketan aurkari gogorren aurka neurtu beharko ditu indarrak, Pauline Ado, Maud Le Car eta Ainhoa Liceaga suertatu baitzaizkio. Leticiak hamazazpigarren amaitu zuen Israelgo Netanya txapelketan, eta Caparicara joandako komunikazio taldeari esan dio lehiaketa hau aprobetxatu nahi duela forma hartzen jarraitzeko, jakitun baita Challenger Serierako Europako txartelak inoiz baino garestiago daudela.
