Munduko Kopan gora egin dute Leire Olaberriak eta Tania Calvok, aukera olinpiarrei eutsiz

Pistako txirrindularitzako Munduko Kopako bigarren proba jokatu da Cambridgen (Zeelanda Berria), eta Basque Teamek babesten dituen Leire Olaberriak eta Tania Calvok sailkapen nagusian aurrera egin dute lortutako emaitzei esker. Olaberriak 11. amaitu zuen Omnium proba, eta sailkapen nagusian hirugarren jarri da, dezente estutu den lehian Rio 2016ko aukerei eutsiz. Scratchean ere aritu zen Omniumean parte hartu zuten ia txirrindulari guztiekin batera, eta laugarren amaitu zuen. Tania Calvok, bere aldetik, Taldekako Abiaduran seigarren egin zuen Helena Casasekin bikotea osatuz, eta Munduko Kopan bosgarrenak dira. Keirinean ere aritu zen gasteiztarra, 9. amaituz. Sailkapen olinpiarra lortzeko kontuan hartuko diren hamar probetatik bi baino ez dira falta, Munduko Kopako azkena Hong Kongen (urtarrilaren 16 eta 17an) eta Munduko Txapelketa Londonen (martxoaren 2tik 6ra), eta oraingoz Leire Olaberria Omniumean eta Tania Calvo Taldekako Abiaduran barruan daude.