Kayak krosean lehiatzen diren euskal palista guztiak Oklahomako Munduko Txapelketako kanporaketetarako sailkatu dira

Miren Lazkano, Maialen Chourraut eta Pau Echaniz, kayak cross modalitatean lehiatzen diren hiru euskal palistak, larunbatean jokatuko den diziplina honetako kanporaketetarako sailkatu dira. Gainera, Miren Lazkanok podiuma oso gertu izan du gaur, egin den erlojupekoan donostiarra laugarren izan baita.

Lazkanok nahiko jaitsiera garbia eta azkarra egin du, eta 51 segundo eta 79 ehunenetan gelditu du kronoa, garailearengandik, Jessica Fox australiarrarengandik, 0.74ra. Mirenek deitoratu egin du ibilbidearen azken zatiko skimotajearen maniobran abiadura pixka bat falta izana. Katerina Bekova txekiarrak (51.08) eta Lois Leaver britainiarrak (51.17) osatu dute gaurkoan podiuma.

Maialen Chourraut hamargarren izan da, 52.93ko markarekin (+1.88), eta gizonezkoen taldean, berriz, Pau Echanizek 27. postuan bukatu du 49.42ko denbora eginda, urrezko dominaren irabazlea izan den Joseph Clarkerengandik 2.88ra. Jakub Krejci txekiarrak bereganatu du zilarra eta David Llorentek eraman du brontzea. 

Gaurko erlojuz-kontrakoa amaituta, Lazkano, Chourraut eta Echaniz larunbatean jokatuko duten kayak kroseko kanporaketen parrillan izango dira.

Palista guztiak ari dira azpimarratzen Oklahoma Cityko kanalean egiten duen bero itogarria, non uraren tenperatura 30 gradura iristen den. Piraguistek jaitsierak egiten dituzte eta berehala kontzentrazio-hoteletara joaten dira.

Indarrak neurtu behar dira, oraindik lehiaketa-jardunaldi asko geratzen direlako. Bihar gizonezkoen eta emakumezkoen sailkapen-txandak izango dituzte kayaketan, bai eta modalitate horretako taldekako probak ere. Maialen Chourraut, Leire Goñi eta Pau Echaniz izango ditugu lehian.