Miren Lazkano Basque Teameko piraguistak hamaikagarren amaitu du Oklahomako Munduko Txapelketako kanoako finalean

Miren Lazkanok hamaikagarren postuan bukatu du Oklahoma Cityn jokatu den ur bizietako Munduko Txapelketako kanoako finala. Basque Teamen beka duen palistak 113.81eko denbora egin du, Tereza Kneblova txekiarrarengandik 13.29ra (100.52). Monica Doria andorrarrak poltsikoratu du zilarra (103.04) eta Klaudia Zwolinska poloniarrak brontzea (103.21).

Donostiarrak Klara Olazabalek bizi izandakoa berriro bizi izateko zorte txarra izan du. Ibilbidearen hasieran zegoen zutoina ukitu du pixka bat, eta horrek deskontrola eragin dio; aldi berean, laugarren atean ukitua ekarriz. Mirenek bere nabigazioa zuzendu behar izan du eta 12 segundo galdu ditu. Bere piraguaren puntak pibotea jo izan ez balu, Mirenek dominengatik borrokatuko zukeen, laugarren atearen ondoren etorri dena jaitsiera bikaina izan baita. Gipuzkoarra dominadunen denbora bertsuetan mantendu da. Txapelketako partzialik onenak izan ditu. Hala ere, Munduko Txapelketa bateko finalean xehetasun txikienak ere aintzat hartu behar dira.

Gaurkoa bigarren finala izan da Munduko Txapelketa absolutu batean Miren Lazkanorentzat. 2015ean Londresen sartu zen, seigarren izanda banakako lehiaketan eta bosgarren patruiletan. Europako txapelketetan lau final jokatu ditu, 2021ean txapeldun izanik, eta Joko Olinpikoetan Parisko finalean lehiatu zen, hamargarren amaituz.

Elitean izan zituen bere hastapenak oraingo paleatzeko moduarekin alderatuta, Mirenek garapen itzela izan duela esan daiteke. Azken denboraldietan, gainera, emaitzak lagun izan ditu. 2025eko Munduko Kopetan hiru aldiz igo zen podiumera, bi urre kayak krosen eta zilar bat kanoan lortuz La Seu d ‘Urgellen. Aurten bere sorbaldako ebakuntza atzean geratu da, eta podiumetik gertu egon da hainbatetan, Tacengo (Eslovenia) Munduko Kopako laugarren postua nabarmenduz.

Behin kanoa modalitateko lehia amaituta, Miren Lazkanok kayak kros lehiaketari ekingo dio. Hiru euskal palista izango ditugu horretan: Miren, Maialen Chourraut eta Pau Echaniz.