Higinio Rivero, loria bikoitza lortu nahi duen balioaniztun kirolaria

Basque Teameko bekaduna olinpikoa izan da paracanoen, Udako Jokoetan, eta hurrengo Neguko Jokoetarako sailkapena lortzen saiatuko da

Higinio Riveroren ezaugarri nagusia zailtasun eta erronkei aurre egiteko duen gaitasuna da. Bere bizitza abentura berrien eta gainditzeko modu berrien bilaketa etengabea izan da. 2013an eskalada egiten izan zuen eta bizkarrezur-muineko lesio bat eragin zion istripuari aurre egin ondoren, piraguismoa praktikatzen hasi zen, eta diziplina horrek asko laguntzen zion errehabilitazio fisikoan, baita mentalean ere.

Pixkanaka, praktika ludikoa atzean geratu zen, lehiaketako lehen urratsak emateko. Hastapenak distantzia luzeetan egin zituen, Munduko Maratoi Txapeldun izatera iritsiz Brandemburgon ospatutako hitzorduan eta Europako txapeldun Pontevedran, biak 2016an. Pietermarithburgen (Hegoafrika) ere irabazi zuen 2017an.

Piraguaren erronkak ez ziren hor geratu. Modalitate olinpikoetara jauzi egitean, Higiniok lorpenak erdiesten jarraitu zuen. Munduko Kopetan bost podium ditu 2016tik (hirutan urrea poltsikoratu du) eta Europako txapelketetan nabarmenak dira 2021eko zilarra Poznanen, 2022koa Munichen eta 2023ko brontzea Monmiedo O ‘Velhon. Hitzordu mundialistetan zilarrezko domina zintzilikatu zuen Kopenhage 2021ean, baina aipagarriak dira, halaber, 2019an, Szegeden (Hungaria) Tokioko Jokoetarako lortutako sailkapena, eta 2023ko Duisburgeko Munduko Txapelketan (Alemania) Parisko Jokoetarako lortutakoa. Frantziakoak bere bigarren Jokoak izango dira.

“Higi”k mimoz gordetzen du Japoniako hitzordu handian irabazitako diploma, eta Frantziako hiriburuan emaitza hori hobetzea du helburutzat. Ez hori bakarrik. Higinio Rivero askoz ere anbiziotsuagoa da. Jokoen orrialde oso berezi bat idatzi duten kirolarien taldean sartu nahi du; Udan zein Neguan bikaintasuna bilatzeko ausardia izan duten kirolari horien parte izan nahi du.

Joko Olinpikoen historian 128 atletek bakarrik lortu dute halako balentria, eta horietatik bostek bakarrik irabazi dute domina bi ekitaldietan: Eddie Eagan estatubatuarrak (boxeoa eta bobsleigh, 1932), Jacob Tullin Thams norvegiarrak (bela eta eski-jauziak, 1924), Christa Luding-Rothenburger alemaniarrak (abiadurako patinajea eta pistako txirrindularitza, 1988), Clara Hughes kanadarrak (txirrindularitza eta abiadurako patinajea, 2006) eta Lauryn Williams estatubatuarrak (atletismoa eta bobsleigh, 2014).

Paralinpiar Jokoetan ere parte hartze bikoitza lortu duten kirolariak nabarmentzen dira, kasu batzuetan domina lortu dutelarik, hala nola Aaron Pike estatubatuarra (atletismoa, biatloia eta iraupen-eskia), Birgit Skarstein norvegiarra (arrauna eta iraupen-eskia), Daniel Wagner danimarkarra (atletismoa eta snowboarda), Danielle Aravic iparramerikarra (atletismoa eta eski nordikoa), Kendall Gretsch (triatloia, biatloia eta iraupen-eskia), Oksana Masters (txirrindularitza, biatloia eta iraupen-eskia) eta Tatyana McFadden (atletismoa eta iraupen-eskia), Momoka Muraoka japoniarra (atletismoa eta eski alpinoa) eta Merle Menje alemaniarra (atletismoa eta iraupen-eskia).

Higiniok aipatutako izarrak bezain polifazetikoa izan nahi du. Bizkaitarrak podiumera igo nahi du VL2-200 metroko paracanoe proban, Parisen, eta, gainera, begiz jota du 2026an Milan-Cortina d’Ampezzon jokatuko diren hurrengo Neguko Jokoetarako sailkapena.

Pariseko hitzordu handirako xehetasunak prestatzen ari den arren, aurtengo neguan iraupen eskian zein biatloian lehiatu da. Lehenengo Toblach Para Nordic World Cup lasterketan, 10 kilometroko bi lasterketa, 1,2 kilometroko esprint lasterketa bat eta 5 kilometroko beste bat eginda. Ondoren, Martell Para Nordic and Biathlon World Cup lasterketan, iraupen-eskiko esprint lasterketa bat eta biatloiko bi egin zituen, 7,5 eta 3,3 kilometrokoak, hurrenez hurren. Maila honetako probetan, aulkian, lehiatu den estatuko lehen kirolaria da.

Parte-hartze horien ondoren, Rivero 58. postutik 38. postura pasa da aulkiko iraupen-eskiko Munduko rankingean, eta biatloian lehen aldiz sartu da taulan, 19. postuan (estatu mailako kirolari bakarra da bi zerrendetan). Emaitza horien arabera, hain desberdinak diren bi urtaroetan arrakasta lortzeko ametsa gero eta hurbilago dauka.