Hainbat kirol praktikatu Basque Teamekin!

Barrutia Herri Ikastetxeko 25 ikaslek hainbat diziplina probatzeko aukera izan zuten atzo gure kirolarien eskutik

Basque Team Fundazioak antolatutako kirol anitzeko jardunaldia atzo egin zen Fadurako Hobekuntza Teknikorako Zentroaren instalazioetan (Getxo). Barrutia Herri Ikastetxetik etorritako 12 urteko 25 gaztek parte hartu zuten bertan, eta Basque Teameko enbaxadore eta kirolariek lagunduta, hainbat diziplina probatu ahal izan zituzten. Horrez gain, klase teorikoan, goi mailari buruz, olinpismoari buruz, Fundazioari buruz eta kirolean eman behar den berdintasun eta inklusioari buruz hainbat gauza ikasi zituzten.

Odei Jainaga xabalina jaurtitzaileak, Kerman Lejarraga boxeolariak, Maider Unda borrokalari ohiak, Iker Sastre mahai-tenis jokalariak eta Barbara Pla errugbi jokalariak euren kirolen nondik norakoak azaldu zizkieten eta praktikan nola jarri behar diren erakutsi zieten.

Jarduera ‘Baloreetan BAT’ proiektuaren barruan kokatu zen. Proiektu honen bitartez goi mailako kirol ez profesionala enpresen esparrura eta hezkuntzara hurbildu nahi da, kasu honetan bezala.

Baloreetan BAT proiektuarekin lotutako edozein eskaera edo proposamen egiteko: baloreetanbat@basqueteam.eus