Gurutze Fradesek 2. postu bikaina Turkiako 70.3 IM-ean
Gloria Ironman 70.3 Turkey probako podiumaren bigarren koskara igo berri da Gurutze Frades Basque Teameko triatleta. 4:28:41eko marka egin zuen, eta Alexandra Tondeur irabazleak bi minutu baino ez zizkion atera. 1.000 triatletak baino gehiagok hartu zuen parte proba honen lehen edizioan.
Frades ilusioz gainezka dago hurrengo hitzorduari begira, Malaysiako Iron Man-a, azaroaren 14an. “Hemen egin dudan lanarekin oso gustura nago. Beti da garrantzitsua emaitza on baten bultzada, are gehiago aurretik daukagun bidaia luzea eta etxetik kanpo egun asko daramatzadala kontuan hartuta. Denboraldi amaierako azken eginahal hauek bide onetik ari naiz gauzatzen”, dio pozarren.
34 urte ditu eta iaz sartu zen Basque Team-en Iurretan jaiotako triatleta hau. 25 urterekin hasi zen triatloi munduan, aurretik saskibaloian aritu ostean. 2011ean lortu zuen lehendabiziko aldiz Distantzia Luzean Espainiako Txapeldun izatea, eta harrez gero 2012, 2013 eta 2014ko tituluak irabazi ditu. Munduko ITU Long Distance Txapelketan 4. sailkatu da aurten, eta garaipen historikoa lortu zuen Vichyn, Frantzian, bertako Iron Man-a irabaziz.
