Basque Teameko Higinio Rivero piraguistak zilarra irabazi du Municheko Europako Txapelketan

Higinio Riverok bere bigarren domina irabazi du kontinenteko txapelketa batean. Lehenengoa iaz zintzilikatu zuen Poznanen (Polonia) jokatutako Europako txapelketan eta gaur postua errepikatu du, VL2-200 metroko proban bigarren metalik preziatuena lortuz.

Bizkaitarra oso indartsu hasi da. Proba amaitzean, Munichera joandako Basque Teameko komunikazio taldeari baieztatu dio asko entrenatu dituela irteerak, gehien findu behar duen estropadako zatia baita. Egiaztatu da zati horretan Higinio Rivero asko hobetu dela. Gaur, ordea, irteerako esfortzuk gogotik eragin dio azken esprintean.

Basque Teameko palistaren beldurra den Norberto Mourao portugaldarraren aurkako lehian Rivero izan da nagusi. Biek borroka gogorra izan dute urrea lortzeko, baina konturatu gabe Tamás Juhàsz hungariarra ziztu bizian eta bizkor etorri da euren bila. Azkenean, bera izan da garaipena eraman duena, 53.948ko denborarekin lehenengo postuan helmugaratuta. Atzetik Rivero iritsi da, 55.159ko (+1.211) erlojupekoa lortuz, eta hirugarren Norberto Mourao portugaldarra 55.472 (+1.524) denborarekin.

Domina honez gain, Higinio Riverok laugarren postua lortu du denboraldi honetan Halifaxeko Munduko Txapelketan. Bere ibilbidean nabarmentzekoak dira Tokio 2021eko diploma paralinpikoa, Poznan 2021eko Europako Txapelketako zilarra, Szegedeko Munduko Kopako brontzea 2020an eta Poznango Munduko Kopako zilarra 2022an.