"Basque Team feminista da. Feminismoa gurekin doa!"
Basque Teamek kirolean berdintasunarekin duen konpromisoa indartzen du
2020an Berdintasunerako I. Plana onartu zenetik, BASQUE TEAMek hainbat ekimen garatu ditu kirol-arloan genero-berdintasuna bermatzeko. Jarduera Fisikoaren eta Kirolaren Zuzendaritzaren Berdintasunerako Estrategiaren eta EAEko Emakumeen eta Gizonen Berdintasunerako VII. Planaren ildoei jarraituz, erakundean genero-ikuspegia zeharkako bihurtzeko ekintzak inplementatu dira.
Hartutako neurri nagusien artean, Berdintasun Planeko ekintzak ezartzeko 15.000 €-ko urteko esleipena nabarmentzen da. 2020-2024 aldian, emakume kirolariek Basque Team beken %55 eta emakume teknikarientzako beken %24 jaso dituzte.
Gainera, Fundazioak estereotipoak ezabatzen eta emakumeen kirola sustatzen lan egin du, komunikazio-politika arretatsu eta inklusibo baten bidez. Ekintza positiboa etengabekoa izan da emakumeak sare sozialetan, kanpaina instituzionaletan eta ekitaldietan ikusgai jartzeko, eta, horrela, emakumeak iruditeria kolektiboan gehiago aintzatesten lagundu du. Ildo horretan, komunikazio-material guztiek hizkuntza inklusiboa eta irudikapen orekatua izan dute.
Azken ziklo olinpikoko proiekturik esanguratsuenetako bat “Imparables-Geldiezinak” izan da, euskal emakume kirolariak ikusarazteko ekimena, 2023an 300.000 euroko inbertsioa izan zuelarik. Proiektu honen barruan, ETB-1en eta beste plataforma batzuetan emititutako dokumental sail bat garatu da, besteak beste, Maialen Chourraut, Edurne Pasaban eta Almudena Cid kirolarien ibilbidea nabarmentzeko. Telesailak funtsezko gaiak jorratzen ditu, hala nola amatasuna kirolean, errendimendu altuko emakumeentzako egitura espezifikoen beharra eta erabaki-postuetan egotearen garrantzia.
Hurrengo urratsak
Basque Teamek goi-mailako kirolean berdintasunaren aldeko apustua egiten jarraituko du, emakume kirolarien presentzia indartuz eta horien garapena genero-ikuspegiarekin sustatuz. Horretarako, emakumeen fisiologiara, amatasunera eta aholkularitza espezializatura bideratutako neurriak ezarriko dira, eta, horrez gain, goi-errendimenduan dibertsitate funtzionala duten emakumeei laguntza handiagoa emango zaie.
Ildo horretan, Basque Teamen II. Berdintasun Plana diseinatu eta garatuko da, kirolaren esparruan berdintasunaren arloko erreferente gisa duen rola sendotuz. Halaber, genero-ikuspegiari buruzko prestakuntza indartuko da teknikarientzat eta kudeaketa-langileentzat, emakumeen fisiologiak goi-errendimenduan duen eraginari buruzko azterlanak egingo dira entrenamendu-programak optimizatzeko eta ikusarazteko kanpainak bultzatuko dira. Hau guztia gauzatzeko, Emakunderekiko eta beste erakunde batzuekiko lankidetza indartuko da.
Basque Teamek berdintasunarekiko konpromisoa berresten du eta etorkizunean aurrerapen horiek sendotzeko lanean jarraituko du, guztiontzako bidezkoagoa eta inklusiboagoa den kirol-ingurunea sustatuz.
