Ander Cepasek bi domina lortu ditu ITTF World Para Elite Yvelines txapelketan
Ander Cepas
Basque Teameko mahai-tenis egokituko jokalariak urrea eskuratu du banakako lehian eta zilarra bikoteka
Ander Cepasek iaz modu ezin hobean hasi zuen ziklo olinpikoa, eta aurten ere bide beretik jarraitzen du. Frantziako herrian jokatu duten ITTF World Para Elite Yvelines Txapelketan donostiarrak urrezko domina irabazi du 9 klaseko banakako lehiaketan, eta zilarra MD18 klasean, taldekako lehiaketan, Juan Bautista Pérezekin bikotea osatuz.
Cepasek urrezko domina eskuratu zuen Saint-Quentin-en-Yvelineseko (Frantzia) Vélodrome Nationalean, binakako probei aurre egin aurretik. Multzoko lehen postuan aurrera egin zuen Abiola Wali Adesope nigeriarra eta Lucas dos Santos Carvalho brasildarra 3-0 gainditu ondoren. Finalerdietara zuzenean sartu ondoren, 3-2 irabazi zion Lucas Didier frantziarrari eta garaikurra eraman zuen finalean Juan Bautista Pérez 3-0 menderatuta.
Hain zuzen ere, 9 klaseko final horretan aurrez aurre egon zirenak elkarrekin borrokatu dira gero MD18 klaseko binakako lehian eta zilarrezko domina irabazi dute. Multzoen fasean 3-0 gainditu dituzte Cigolotti eta Didier frantziarrak eta emaitza beragatik Adesope eta Agunbiade nigeriarrak. Finalerdietan 3-2 azpiratu dituzte Oliveira eta Guarnieri brasildarrak. Finalean ezin izan dituzte Nozdrunov eta Iakovlev errusiarrak gainditu eta 0-3ko emaitzarekin galdu dute.
Bi domina hauek martxoan hasi zen zerrenda luze bati batzen zaizkio. Ander Cepasek banaka urrea eta bikote mistoetan zilarra lortu zituen Lignanon, urrea binaka eta bikote mistoetan Costa Bravan, zilarra banaka eta binaka Beijingen, banakako eta taldekako urrea Sao Paulon, banakako zilarra Laskon eta urrea banaka zein binaka Taipein.
Aurten Ander Cepasen helburu nagusia Munduko Txapelketa izango da, azaroaren 13tik 19ra Pattayan, Thailandian. Ander Cepas mahai-tenis egokituko Munduko rankingeko lehena izan da 9 klasean, diziplinaren gailurrean kokatuta, nahiz eta txapelketa global handi batean bere mugarririk nabarmenena 2024ko Parisko Joko Paralinpikoetan lortutako brontzezko domina izan. Thailandian bilatuko du gehien desiratzen duen tituluetako bat, Munduko txapeldunarena.
