Ander Cepasek, Basque Teameko mahai-teniseko jokalariak, bi urre irabazi ditu Sao Pauloko ITTF World Para Challengerrean

Ander Cepas, Basque Team Fundazioaren beka duen kirolaria, podiumaren gorengo tokira igo da berriro asteburu honetan, 2026an nazioarteko txapelketetan bere garaipen-ibilbidearekin aurrera jarraitzeko. Sao Paulon jokatutako torneoan, bere faboritoetako bat, urrezko domina lortu du banakako lehiaketan, 9 klasean, eta baita binakako lehiaketan ere, Juan Bautista Perezekin batera, MD18 klasean.

Banakako txapelketan donostiarrak ez zuen zalantza izpirik utzi Tiago Jose Albuquerque de Freitas brasildarraren aurka jokatu zuen multzoen faseko lehen partidan, 3-0 irabazita (11-5, 11-2, 11-6). Lehen faseko bigarren norgehiagokan ere emaitza bera lortu zuen Logan Wade Watson estatubatuarra menderatuta (11-1, 11-7, 11-9) eta gauza bera gertatu zen final-laurdenetan Eithan Skliarsky argentinarraren aurka (11-4, 11-6, 11-6) eta finalerdietan Jan Reinig alemaniarraren kontra (11-9, 11-8, 11-6). Horrela heldu zen Cepas finalera, set bakarra galdu barik. Azken neurketan Koyo Iwabuchirekin neurtu behar izan zituen indarrak, eta japoniarraren aldetik aurreko aurkarien aldetik baino erresistentzia handiagoa izan zuen arren, Anderrek dominarik preziatuena poltsikoratu zuen lehiakidea 3-1 gaindituta (11-8, 11-7, 9-11, 15-13).

2024ko Pariseko Jokoetan brontze bat irabazi zuen gipuzkoarrak maila honetako lehiaketetan 14. banakako urrea lortu du Sao Pauloko domina honekin.

Bestalde, binakako lehian, 4. multzoaren barruan, Ander Cepasek eta Juan Bautista Perez beteranoak 3-2 (10-12, 6-11, 11-9, 11-6, 11-6, 11-6) irabazi zioten Eithan Skkliarsky argentinarrak eta Takumi Tsujimura japoniarrak osatutako bikoteari lehen neurketan. Bigarren norgehiagokan “Walkover” delakoagatik nagusitu ziren, lehiatu beharrik gabe gailendu ziren, izan ere, Lucas Dos Santos eta Joao Pedro Riberiro brasildarrak ez ziren aurkeztu edo erretiratu ziren partida hasi aurretik. Final-laurdenetan 3-0 (11-8, 11-5, 11-1) irabazi zuten atzo Jose Luis Cerpa eta Andres Beroiza txiletarren aurka eta finalerdietan gauza bera gertatu zen Gabriel de Oliveira eta Luiz Felipe Guarnieriren aurka (13-11, 12-10, 11-6). Finala ere Cepas eta Perezen bikotearen alde erori zen argi eta garbi. Azken borrokan 3-0 (11-5, 12-10, 11-5) azpiratu zituzten Hayuma Abe eta Koyo Iwabuchi japoniarrak.