Alan Clealandek, Julen Lasa zarauztarrak entrenatutako surflariak, El Salvadorreko Munduko Txapelketa irabazi du
Julen Lasa zarauztarrak entrenatutako surflari mexikarrak 18.23ko puntuazioa lortu du El Salvadorren jokatutako World Surfing Games txapelketan.
Sekulako puntuazioekin, 9.73ko olatu bati (txapelketako garaiena) eta 8.50eko beste bati esker, finalean Lucca Mesinas (16.17) eta Miguel Tudela (14.96) perutarrak eta Kanoa Igarashi japoniarra (14.80) gainditu ditu.
Julen Lasa, Keoni Lasaren, Leilani McGonagle costarricarraren, Noah Klapp alemaniarraren eta Alan Clealand beraren entrenatzailea, bi urte eman ditu mexikarra entrenatzen, batez ere alderdi mentalak eta uretan erabakiak hartzeko gaitasuna lantzen. Julen Lasak eskarmentu handia du surfaren munduan eta aurretik taldeak gidatu zituen, besteak beste, Ruben Vitoria, Nadia Erostarbe eta Janire Gonzalez Etxabarri zuzendu zituelarik.
Emakumezkoen mailan, Tati Weston Webb brasildarrak irabazi du, Johanne Defay frantziarraren, Erin Brooks kanadarraren eta Vahihe Fierro jatorri tahitiarreko frantziarraren aurretik. Hain zuzen ere, azken hori izan da 2024ko Pariseko Jokoetarako Europako plaza eskuratu duena. Gizonezkoen koadroan Kali Vaast frantziarrak eskuratu du plaza.
