Tania Calvok hamahirugarren postuan amaitu du Municheko Europako Txapelketako scratcha

Basque Teameko txirrindulariak ezin izan ditu bere ezaugarri guztiak erakutsi Messe München belodromoan, eta penatuta geratu da 13. postuan amaitzeagatik Munichen jokatzen ari den Europako txapelketako scratch proba.

Gaur egun Tania Calvo iraupen-probetan zentratuta dago, baina esprinter gisa duen iraganagatik scratch lasterketa bere faboritoetako bat da orain. Hala ere, txirrindulari arabarrak Munichera joandako Basque Teameko komunikazio taldeari esan dio bai atzo, taldekako jazarpen proban, eta bai gaur, scratcheko proban, ez dela eroso sentitu.

Alde batetik, oraindik ez du feeling berezirik sentitu Alemaniako belodromoarekin, eta, bestetik, duela gutxi covida berriro pasatzea agian bere ondoezaren beste arrazoia izan daiteke.

Korrikalariek arratsaldean egin behar zituzten 10 kilometroen hasierako itzulietan, Taniak aurreko postuei eutsi die, eta 27. eta 23. itzulietan, adibidez, buru jarri da. Hala ere, amaierarako 10 itzuliren faltan Jade Labastugue frantziarrak erasoa jo du eta taldea bitan banatu da. Tania bigarren multzoan geratu da eta ordutik aurrera ezinezkoa izan zaio emaitzari buelta ematea.

“Teknika asko falta zait oraindik, eta ausardia ere bai, kokatzerakoan, hutsuneak bilatzerakoan eta erasotzen saiatzerakoan” aitortu du Calvok lasterketa amaitzean.

Taniak 13. postuan bukatu du proba. Anita Yvone Stenberg norvegiarrak lortu du urrea, Jessica Roberts britainiarrak zilarra eta Nikola Wielowska poloniarrak brontzea.

Tania Calvori puntuazio proba, banakako jazarpena eta berarentzat garrantzitsuena den Madison proba geratzen zaizkio oraindik jokatzeko Europako txapelketa honetan.