"Sendatuta iristen naiz, gogo handiz; beraz, ahal dugun guztia egingo dugu"

Basque Teameko Alvaro Romero snowboardlariak goxo bukatu nahi du bere lehen urtea elitean

Álvaro Romero pozik dago Munduko Kopan onenekin lehian egin duen bere lehen denboraldiarekin. Veysonnazen jokatzen den finalerako sailkatzea lorpen handia da berez, baina Basque Teameko kirolaria bere bertsiorik onena erakusteko irrikan dago.

Donostiarrak duela gutxi pasa du covida, eta horregatik ez zuen sailkapena lortu joan den asteburuan Reiteralmen. Suitzako hitzordura sendatuago iristen da, eta zer egiteko gai den erakusteko gosez.

Romerok zortzigarren postua lortu zuen Krasnoyarskeko (Errusia) Munduko Kopan eta lehen garaipena lortu zuen Europako Kopan urtarrilean, Reiteralmen.

Beijingeko Jokoetan parte hartzeko ordezkoen zerrendan egon zen, eta kanpoan geratu zen erabaki bidegabe samar batengatik bere ustez, baina horrek guztiak hurrengo denboraldiei begira etengabeko ikaskuntza egiteko balio izan dio.

Alvarorentzat asteburuko lasterketa ez da urteko azken lasterketa garrantzitsua izango, apirilean junior mailako Munduko Txapelketa jokatuko baitu, Veyonnazen hain zuzen ere, horregatik asteburu honetan eramango dituen xehetasunek asko lagunduko diote.