Ander Cepas eta Iker Sastre, Basque Teameko beka duten mahai-teniseko jokalariak, Europako txapeldunorde

Gainera, Olaia Martinez donostiarrak brontzea irabazi du banakako lehian eta zilarra binakako mistoetan, Cepasekin batera

Euskadik, gaur egun, mahai-tenis egokituan nazioarte mailako ordezkari bikainak ditu. Hala berretsi dute beste behin ere Ander Cepasek eta Iker Sastrek, biak Basque Teamen bekadunak, eta Olaia Martinez gazteak, Helsingborgen (Suedia) jokatutako Europako txapelketatik lau domina etxera ekarrita. Banakako lehiaketan, Ander Cepasek zilarrezko domina irabazi du 9 klasean eta Olaia Martinezek brontzezkoa 8 klasean. Binakako txapelketan, Iker Sastrek zilarrezko domina bereganatu du Daniel Rodriguezekin batera MD4 klasean, eta bikote mistoen kasuan, Anderrek eta Olaiak zilarrezko domina ere eskuratu dute.

Ander Cepasek (21 urte) hamarkada bat banakako partida bat galdu barik daraman Laurens Devos belgikarraren aurka baino ez du galdu, eta bere lehen domina kontinentala poltsikoratu du 9 klasean. Donostiarrak eskuineko alboko hemiparesia du, eta horrek mugikortasuna eta trebetasuna baldintzatzen dio eskuan eta hankan; dena den, ibilbide meteorikoa josten jarraitzen du. Nazioarteko 40 domina baino gehiago ditu (9 denboraldi honetan), 2024ko Parisko Joko Paralinpikoetan brontzea irabaztetik dator, eta Munduko zerrendan lehen postuan dago kokatuta.

Bere joko elektrikoak distira egin du multzoen fasean debuta egin zuenetik. 3-0 irabazi zion Dezso Bereczki hungariarrari eta 3-0 Ido Yahoda Hamami israeldarrari, lehenengo sailkatuz eta zuzenean final-laurdenetan sartuz. Bertan Jan Reinig alemaniarrari 3-0 irabazi zion (11-6, 11-6, 11-2) eta finalerdietan 3-1 (11-5, 11-4, 8-11, 11-9) Lev Kats ukrainarrari. Finala Laurens Devos burdinazko jokalariaren aurka jokatu zuen. Belgikarra, 2016ko Rioko, 2020ko Tokioko eta 2024ko Pariseko txapeldun paralinpikoa, bi aldiz Munduko txapelduna eta sei aldiz Europakoa, hamar urtez galdu gabe egon da, 2015etik porrotik jaso gabe. Cepasek partida ausarta planteatu zuen, oldarkorra, inork zeharkatu ez duen harresia apurtzeko erabakia hartuta. Eutsi, erantzun, txapeldunari exijitu zion, baina Devosek 1-3 irabazi zuen (11-8, 8-11, 11-13 eta 7-11).

2 klasean Iker Sastrek final-zortzirenetan esan zuen agur.

8 klasean, berriz, Olaia Martínezek lortu zuen brontzea.

17 urteko donostiarrak garun-paralisia du ezker alboko hemiparesiarekin, eta txapelketa bikaina egin du Helsingborgen. Estatu mailan emakumeen dominarik gabeko 30 urteko bolada hautsi du. Lehortea 1995ean hasi zen, Hilleroden Huelvako María Cinta Campiñak Europako Txapelketan brontzea eskuratu zuenean.

Olaiarentzat, mahaia babesleku bat da. Lehenago igeriketa probatu zuen, baina igerilekuak ez zuen harrapatu. Amak, orduan, mahai-tenisera eraman zuen, eta han aurkitu zuen bere zorion-lekua, bola zuri txikia jotzen.

Helsingborgen egin zuen debutean 0-3 galdu zuen Juliane Wolf alemaniarraren aurka (10-12, 7-11, 5-11). Ondorioz, Zsofia Arloy hungariarrari irabazi behar izan zion multzoko bigarren postua lortzeko. Asko sufrituta, 3-2 (11-9, 4-11, 11-7, 10-12, 12-10), final-laurdenetarako sailkatu zen. Bertan 3-0 gailendu zitzaion Freja Juhl Larsen danimarkarrari (12-10, 11-7, 11-9). Finalerdietan Grace Williams britainiarra egokitu zitzaion, Europako txapeldunordea 2023an eta Munduko txapelduna binakakoan. Williamsek hobeto jokatu zuen eta 0-3 irabazi zuen.

Bestalde, binakako txapelketan, Iker Sastrek eta Daniel Rodriguezek bikote gisa txapelketa kontinental batean lehen domina lortu dute MD4 klasean, gurpildun aulkian dauden kirolarientzat gordetako kategorian. Zilarrezko domina euren lehen podium kontinentala izan da bikote bezala elkarrekin eman duten lehen denboraldian.

Bilbotarrak eta granadarrak osatutako bikoteak denbora gutxi behar izan du berotzeko. Txapelketaren lehen puntutik erakutsi zuten euren konpenetrazioa zorabiozko abiaduran hazten dela. Urteko emaitzek, podiumekin Eslovenian (zilarra World Elitean eta brontzea Challengerrean) eta Polonian (zilarra Challenger batean), Suedian zerbait handia lortu nahi zutela iragartzen zuten.

Sastrerentzat, hitzordua inflexio puntua izan da, urte askoan Miguel Angel Toledorekin mahaia partekatu ondoren. Berarekin maila goreneko nazioarteko dominak eta diploma paralinpikoak pilatu zituen. Bilbotarra Europako txapelketara fisikoki murriztuta iritsi zen, irailean entrenamendu batean izandako bi saihets-hezurren hausturatik erabat osatu gabe. Hala ere, itxura ona eman du.

Lehen partidan markagailuari buelta eman behar izan zioten Federico Crosara eta Federico Falco italiarren aurka, baina 3-1 irabazi zuten (9-11, 11-7, 11-7, 11-6). Finalerdian, Rafal Czuper eta Tomasz Jakimczuk poloniarren aurka 3-0 nagusitu ziren (11-8, 11-2, 11-8). Azken hitzorduan Peter Lovas eta Jan Riapos eslovakiarren aurka jokatu zuten, 2024ko Pariseko txapeldun paralinpikoen kontra. Lovas eta Riapos nagusi izan ziren eta lehenengo seta eraman zuten. Sastrek eta Rodriguezek erreakzionatu egin zuten bigarren partzialean, baina hirugarrenean galdu zuten. Laurdena oso parekatua joan zen eta markagailu berdinarekin (10-12) ihes egin zuen, 1-3ko emaitzarekin amaituta.

MD18 klasean, Ander Cepasek eta Juan Bautista Pérezek dominak ukitu zituzten laugarren bukatuta, eta emakumezkoen lehiaketan, W20 mailan, Olaia Martinezek eta María Miguelesek osatutako bikoteak 0-3 galdu zuen Natalia Partyka eta Karolina Pek poloniarren aurka final-laurdenetan.

Europako txapelketa ixteko, Cepasek eta Martinezek kontinenteko lehen domina lortu dute estatu mailan proba misto batean. 2022an hasi ziren elkarrekin lehiatzen, eta urte horretan lortu zuten lehen titulua: urrea Txekiar Errepublikako Irekian. Geroztik hazi besterik ez dira egin.

Aurten podiumera igo dira World Future txapelketetan -urrea Costa Bravan eta brontzea Lahtin (Eslovenia) -. Ander eta Olaia 3-0 gailendu zitzaizkien final-zortzirenetan (11-8, 11-7, 11-5) Tahir Efe Sahin eta Merve Demir turkiarrei. Euren ibilbidea ez zen aldatu final-laurdenetan, non berriro errepikatu zen 3-0eko markagailua (11-7, 11-7, 11-9), oraingoan Roy van der Burg eta Frederique van Hoof holandarren aurka.

Finalerdietan 3-0ekoa sinatu zuten (11-9, 11-6, 12-10) Borna Zohil eta Mirjana Lucic kroaziarren aurka, zilar historikoa eta final handirako txartela lortuz. Bertan, Piotr Grudzien eta Karolina Pek poloniarrek, brontze paralinpikoa Paris 2024an eta Europako txapeldunak 2023an, 0-3 irabazi zuten (3-11, 8-11, 9-11).