Maialen Chourraut Basque Teameko piraguistak ezin izan ditu final-laurdenak gainditu Europako Jokoetako kayak krosean

Maialen Chourraut lehenengo kanporaketan geratu da kayak crosseko txapelketatik kanpo Krakobia-Malopolskako Europako Jokoetan. Atzo arratsaldean Maialen Chourrautek hirugarren denborarik onena egin zuen kronometratutako txandan, beraz, gaurko kanporaketetarako sailkatu zen, final-laurdenetako eguneko hirugarren seriean sartuz, Elena Lilik alemaniarra, Martina Wegman holandarra eta Alena Marx suitzarra aurkari zituela.

Hiru domina olinpikoren jabeak ez du jaitsiera ona egin, eta ateetako batean izandako hutsegite batengatik kargu hartu diote. Gainera, lasartearra hirugarren postuan helmugaratu da, Lilik eta Wegmanen atzetik, eta lehen kanporaketan, final-laurdenetan, at geratu da.

“Jaitsiera borrokatua izan da. Hasieratik, arrapalatik, zuloa aurkitu behar da pala sartu eta piragua sartzen saiatu ahal izateko zure hutsunea irekitzeko, eta hasieran banuela zirudien arren, borroka bat egon da, guda bat gure artean, piragua lekuz mugitu didate eta bigarren atean kanpoan geratu naiz. Palarekin iristen saiatu naiz, eta gero borrokan ere bai. Uste dut beste neska batek ere atzean utzi duela ate hori. Lau nesketatik bik ez badute bigarren atea egitea lortu… hasiera indartsua izan da. Hutsuneak bilatzen saiatzea ez da batere erraza, maila altua da eta borrokatu egin behar da. Pena da hurrengo txandan ezin egotea, baina hori horrela da eta aurrera” esan dio Maialen Chourrautek  Poloniara joan den Basque Teameko komunikazio taldeari.

Modalitate honetako urrezko domina Viktoriia Us ukrainarrarentzat izan da, eta zilarra eta brontzea Ricarda Funk alemaniarrak eta Stefanie Horn italiarrak irabazi dituzte, hurrenez hurren.