Iñigo Llopis Teameko igerilariak brontzezko domina lortu du Europako 400 metroko proban
Iñigo Llopis
Nahia Zudaire bikaintasun-proiektuko kideak zilarra irabazi du distantzia berdinean
Iñigo Llopis Basque Teameko igerilaria, dagoeneko Tokioko jokoetarako sailkatuta dagoena, Europako txapelketako podiumera igo da inaugurazio jardunaldian. Gipuzkoarrak brontze bat zintzilikatu du S8 kategoriako estilo libreko 400 metrokoan. Bere proba gogokoena ez izan arren, gazte donostiarrak sasoi onean dagoela baieztatu du. 300 metroetatik igaro ostean, hirugarren postuan kokatu da eta horri eusten jakin du. 4:47.02ko denbora egin du, Andrei Nikolaev errusiarraren eta Alberto Amodeo italiarraren atzetik.
Minutu batzuk geroago, Basque Teamek eta Euskadiko Kirol Egokituaren Federazioak abian jarritako bikaintasun-proiektuko kide den Nahia Zudairek bere maila erakutsi du igerilekuan, S8ko estilo libreko 400 metrokoan zilarra bereganatzeko. Bere lehen domina kontinentala da. Xenia Francesca Palazzo italiarrak urrea ziurtatuta zuen eta Zudairek Mira Jeanne Maack alemaniarrari irabazi dio duelua bigarren postuagatik. 5:06.16ko denbora eginda, Espainiako errekorra hautsi du. Nahiak badu gutxieneko B marka Tokioko Jokoetan lehiatzeko. Japoniako hitzorduan parte hartzeko aukera emango dio, gutxieneko A markarekin bete gabe geratzen diren plazen arabera.
