"Hobeto sentitzen naiz, konfiantza gehiagorekin, eta lehiatzen naizen guztietan nire onena ematen dut"

Iñigo Llopis Basque Teameko igerilaria nazioartean erreferente sentitzen da Madeirako Munduko Txapelketan bere palmaresari beste hiru domina gehitu ondoren

Tokioko Jokoetan zilarrezko domina bat eskuratzean, Iñigo Llopisek argi utzi zuen hurrengo urteetarako kontuan hartu beharreko kirolarietako bat izango zela, baina berriro erakutsi du hilabete honetan Madeiran jokatu den igeriketa egokituko Munduko Txapelketan, zilarra irabazi baitu bizkar estiloko 100 metroetan (S8) eta brontzezko domina errelebuko bi probatan (estilo libreko 4×100 metroko proban, eta estiloetako 4×100 metrokoan.

“Asko gozatu dut txapelketa honetaz, emaitzak oso onak izan dira, eta, gainera, bi domina lortu ahal izan ditugu erreleboarekin, igeriketan, zuk bakarrik hainbeste ordu ematen dituzun kirol batean, taldekideekin partekatu ahal izatea oso polita izan da”, adierazi dio Llopisek Basque Teami.

Taldeko probetan lortutako dominek banakako lehiaketan lortutakoa baino zapore gozoagoa utzi diote.

“Erreleboetako dominak politagoak izan dira. Asko gozatu dut lankideekin. Errelebo berria izanik, mistoa, aurkariak nolakoak izango ziren ikusteko zalantzarekin gindoazen, baina ilusioz ere bai, eta hori agerian geratu da marka oso onak egin ditugulako”, azpimarratu du.

Iñigoren proba fetitxea bizkar erako 100 metroko lasterketa da. Begirada guztiak bere gain hartzen ditu proba horretako finala iristen denean, baita txapelketen aurreko kinielak egiten direnean ere, baina horrek ez dio presio erantsirik eragiten.

“Bizkar eransentitzen naiz erosoen, sentsazio onenak izaten ditut, eta egia da hor goian pixka bat hobeto ari den amerikarra daukagula, baina saiatu behar dugu urtetik urtera harengandik gertuago egoten, eta ea egunen batean irabazi ahal diogun”, dio donostiarrak.

Onenen artean egoten jarraitzeko Iñigok eguneroko lana nabarmentzen du gakoetako bat bezala. Inbertitutako orduak funtsezkoak dira Llopisen ustez; Basque Teamek bekatutako bere teknikari den Isaac Pousadarekin egunero egiten duen lana beharrezkotzat jotzen du.

“Nire ustez, eguneroko bizitzan garrantzitsuena egiten duzunaz gozatzea da. Niri asko gustatzen zait igerilekuan zein gimnasioan entrenatzea, eta, nire ustez, horrek lagundu egiten dizu lehiaketan errendimendu handiagoa lortzen” ziurtatu du Llopisek.

Tokion eta azken Munduko eta Europako Txapelketetan egindakoaren ondoren, igeriketa egokituaren elitean sartzeak nola sentiarazten duen galdetzean, Iñigo Llopisek alde pertsonala nabarmendu du, kirolak zein ondo sentiarazten duen, kontuan hartu gabe jada erreferentea dela bere aurkarientzat.

“Hobeto sentitzen naiz, gauzak egiteko konfiantza handiagoarekin sentitzen naiz, horregatik lehiatzen naizen bakoitzean nire onena ematen dut, beti nire markak hobetzen ahaleginduz, horrekin emaitzak lortzeko, baina beti egunerokoan hobea izaten saiatuz, gero hobeto lehiatzeko” esan du Iñigok.

Epe ertainera, Llopisen helburu nagusia 2024ko Pariseko Jokoak dira, baina hurrengo Munduko Txapelketak bistatik galdu gabe.

“Beti daude jomugan. Jokoak dira ilusio handiena egiten diguna. Beti markatutako data da, baina aurten Munduko Txapelketa izan dugu Madeiran, datorren urtean Manchesterren. Urtero helburuak jarri behar dira. Orain oporrak hartzera eta Manchesterrekoari ekitera datorren urtean!” gaineratu du.