Emakumezkoen errugbi selekzioak, Amaia Erbina kapitainarekin, World Seven Seriesetan mailari eustea lortu du Toulousen

Erronka zaila zen. Toulouseko hitzorduan, mailari eustea  zeukaten jokoan; hau da, “Core Team” edo “HSCB World Rugby Seven Series”etako talde finkoa izaten jarraitzea eta lortu dute. Amaia Erbina Basque Teameko kirolaria kapitain duen eta Anne Fernandez de Corresek ere parte hartzen duen selekzioak helburua bete du.

Toulouseko serieko bigarren jardunaldia ez zen batere ondo joan; Eskoziari hamar puntuko aldearekin irabaztea (17-7) ez zen nahikoa izan urrezko final-laurdenetarako lehian sartzeko, eta bederatzigarren posturako finalerdietan Hegoafrikaren aurka galdu izanak (19-21) gauzak zailago jarri zituen.

Toulouseko hitzorduaren hirugarren eta azken egunean, Espainiako selekzioak manederatu zuen Ingalaterra (26-14) 11. postuan amaitzeko, eta bi puntu lortu zituen sailkapen nagusian.

Hala ere, Erbinaren konbinatuarentzat itxaropen bakarra zen Brasilek, salbazioa lortzeko lehian aurkari nagusiak eta urrezko final-laurdenetan sartzeko helburua lortu zuenak, zortzigarren postuan bukatzea. Zorionez, hegoamerikarrek ezin izan zuten Frantzia gainditu finalerdietan (7-36), ezta Estatu Batuak ere zortzigarren posturako finalean (7-15). Horrela, kariokek 6 puntu lortu zituzten, baina ez ziren nahikoa izan sailkapen nagusian espainiarrak gainditzeko. Amaia Erbinaren taldea, 26 punturekin, 24 puntu pilatu dituen Brasilen gainetik geratu da, denboraldiko bi emaitzarik txarrenak kenduta.