Iñigo Llopisek urrea gehitu dio gaur Europako Txapelketan atzo lortutako brontzeari
Iñigo Llopis
Basque Teameko igerilariak urrezko domina zintzilikatu du S8ko bizkar erako 100 metrokoan
Iñigo Llopisek Europako titulua irabazi du Madeiran jokoan den igeriketa egokituko txapelketan. Llopisek erakustaldia eskainita lortu du, Tokioko Joko Paralinpikoetan goreneko postuetan izateko borrokatu daitekeela baieztatuz.
Isaac Pousadak entrenatzen duen eta Basque Team fundazioaren beka jasotzen duen donostiarrak ez du hutsik egin; itsaspeko luze bat eta irteera gogor baten ondoren, lasterketa burua izan da lehen 50 metroetan, eta norabidez aldatzeko bira egin ondoren, Bohdan Hrynenko ukrainarrak mehatxu egin arren, buruan jarraitu du, urrea eskuratu arte, 1:06.09ko denbora eginda. Marka horrekin, gainera, Espainiako errekorra jaitsi du. Sergio Martos valentziarrak osatu du podiuma.
Gaurko domina atzo S8 estilo libreko 400 metrokoan lortutako brontzezkoari gehitzen zaio.
