Euskal emakume guztiek pronostikoak bete dituzte eta World Surfing Gameseko bigarren kanporaketan sartu dira

Gaur amaitu dute 2028ko Los Angeleseko Joko Olinpikoetarako lehen geldialdi puntuagarria den eta ISAk (International Surfing Association) antolatzen duen Munduko Txapelketako emakumezkoen koadroaren lehen kanporaketa.

Atzo emakumeak Punta Rocaseko podiumean lehiatzen hasi ziren, baina goizeko lehen orduan sistema elektrikoarekin arazo bat sortu zenez, jardunaldia atzeratuz joan zen eta eguneko azken txandak gaurko egiteke geratu ziren. Janire Gonzalez-Etxabarrik bigarren kanporaketarako txartela lortu zuen atzo eta gaur Basque Teameko bikaintasun proiektuko Ariane Ochoak eta Baionan jaiotako Naïa Monte surflariak ere lortu dute txartela.

Iparraldekoa eguneko lehen txandan lehiatu da. 15 urterekin, ISA Munduko Txapelketa honetan ez da kikildu, eta zirkuitu pribatuan bezala, kirol honetan etorkizun oparoa duela erakutsi du beste behin. Baionakoak 11.33ko puntuazioa lortu du, Panamako Belen Elizondo (4.5) eta Guatemalako Darlyn Ramirez gaindituz. (0.8).

Ariane Ochoak ere nagusitasun handiz lortu du txartela. Bilbotarrak 12.00 puntu lortu ditu Coral Jeanne Bonilla mexikarraren (2.43) eta Wan Yu Chen Taipeiko surflariaren aurka (4.37). Ariane denboraldi bikaina egiten ari da, eta azken jarduketek CTan, munduko zirkuiturik handienean, sartzeko aukerak ematen dizkiote. Bizkaitarrak Perura joandako komunikazio taldeari adierazi dionez, kanpotik itxura bestelakoa izan daitekeen arren, Punta Rocaseko olatua olatu zaila da, eta egingo diren irakurketak bikainak izan beharko dira lehiaketa nagusian aurrera egiten jarraitzeko.