Antartika zeharkatu nahi dute Iñurrategik, Vallejok eta Zabalzak Hego Poloan barna
Amundsen-ek Hego Poloa konkistatu zueneko mendeurrenean egingo dute saiakera
Bueltan dira Iñurrategi, Vallejo eta Zabalza. Aurtengo udaberrian Groenlandian izandako esperientzia arrakastatsuaren ondoren hurrengo helburuan koxka bat igo nahi dute hiru alpinistek, hain zuzen ere, Antartikan zeharkaldia burutu Hego Polora iritsiz eta inolako laguntzarik gabe. Oraingo erronka distantzia askoz luzeagoa izan arren inolako laguntzarik gabe erdietsi nahi dute helburua, eskien gainean eta haizearen indarra kometen bitartez baliatuz.
Ronald Amudsen-ek 1911an egin zuen bezala, hiru alpinistek balentria errepikatu nahi dute Hego Polora helduz eta Antartika ia 3 hilabeteko zeharkaldia burutuz. Abenturaren nondik norakoak bihar emango dituzte jakitera Bilboko Eusko Jaurlaritzaren egoitzan egingo duten agerraldian, espedizioaren babesleak lagunduta, hau da, BAT Basque Team, BBK eta Naturgas Energia.
