Sergio Vez seigarren Europako Curling Txapelketan

Sergio Vez basauritarra, Basque Team kirolaria, Europako Curling Txapelketan ez hotz eta ez bero geratu da. Espainiako selekzioko kide izan da B mailako txapelketan Mikel Unanue, Antonio de Mollinedo eta Jose Manuel Sanguesarekin, eta azken partiduan lortu dute maila mantentzea. Lorpen eskasa helburu nagusia A mailara igotzea zela aintzat hartuta, baina aringarria aldi berean, maila galtzeko zorian izan direlako. Danimarkako Esbjerg hirian jokoan dira txapelketak, eta Espainia 6. sailkatu da, finalerdietan sartu eta igotzeko aukera izatetik garaipen bakarrera, eta jaisteko porrot bakarrera. Hiru neurketa irabazi dituzte (Ingalaterra, Estonia eta Israelen aurka) eta lautan galdu dute (Austria, Kroazia, Lituania eta Eslovakia). Azken jardunaldian mailari eusteko garaipena lortu beharra zeukaten, eta majo sufrituta lortu dute hori. Israelen aurka arauzko 10 denborak 6na amaitu dituzte, eta gaineratutako denboran 1-0 estu batekin irabazi dute neurketa Sergio Vez eta konpainiak.