Asier Agirre paratleta maila goreneko kirolariei eskainitako Basque Teamen beka programan sartu da
Atletismo egokituan lehiatzen den Asier Agirrek eta BAT Basque Teameko koordinatzaileak, Olatz Legarzak, maila goreneko euskal kirola sustatzen duen beka programaren kontratua sinatu dute gaur goizean.
Asier Agirrek (Durango, 1989) Espainiako txapelketa irabazi du mendian zeharreko modalitatean, desgaitasun psikikoa duten kirolarientzako proban. Gainera joan den astean diziplina honetan Italian jokatu zuten pista estaliko Munduko Txapelketan parte hartu zuen estatuko taldearekin. 3.000 metroko proban laugarren postua erdietsi zuen eta seigarrena 1.500 metrokoan. Hori pizgarri itzela izan zen Rioko Paralinpiar Jokoetarako sailkapenagatik borrokan jarraitzeko. Artunduaga klubeko kirolaria kroseko estatuko txapelduna izan zen 20 urterekin eta kirolen inguruko erdi mailako gradu bat ikasi du Durangoko institutuan.
