15-ekaina-2016
Markel Alberdi igerilaria Rioko Olinpiar Jokoetan lehiatuko da
Britainia Handiak uko egin dio estilo libreko 4X100 probari eta horrek bidea ireki dio igerilari eibartarrari.
Basque Teameko Markel Alberdi igerilaria Olinpiar Jokoetan lehiatuko da gizonezkoen estilo libreko 4X100 proban. Errelebu horretan parte hartu ahal izateko, sailkatutako talderen batek uko egin behar zion probari, Markelen laukotea bosgarren postuan amaitu baitzuen Europako Txapelketaren osteko errepeska olinpikoan. Britainiarrek 4X200 metroko errelebua irabazi zuten 2015eko Munduko Txapelketan eta horretan dute jarrita arreta, horregatik errelebu motzean ez parte hartzea erabaki dute.
Laukotea Markel Alberdik, Bruno eta Miguel Ortiz-Cañavate eta Aitor Martinezek osatuko dute.
