Maialen Chourraut txapeldun olinpikoak bosgarren postuan bukatu du Paueko Munduko Kopa. Basque Teameko piraguista hamargarren izan zen atzoko sailkapen txandan, laugarren gaurko finalerdian eta bosgarren K1eko finalean. Zirkuitu trabatu batean, Maialenek kalitatezko zertzeladak utzi ditu, baina, zoritxarrez, ukitu txiki bat ere egin du 19. atean.
“Pauen entrenatu dut gehien uda honetan. Uretan Maialen azkar bat ikusteko ilusioarekin nentorren. Nabigazio oso ona egin dut alde batzuetan, baina akats nabariak ere izan ditut. Bosgarren postua ez da txarra, baina ez du espero nuena betetzen” adierazi dio Maialenek Basque Teami finala amaitzean.
Bestalde, Olatz Arregui debutariak, Basque Teamek eta Euskadiko Piraguismo Federazioak abian jarritako bikaintasun proiektuaren kideak, zazpigarren postua lortu du bere lehen nazioarteko Munduko Kopan, maila absolutuan; eta Joan Crespo 25. izan da K1eko finalerdian.
Bihar Klara Olazabalek eta Miren Lazkanok C1eko finalerdia jokatuko dute 9:00etan.
