Zilarra Iñigo Llopisentzat bizkar erako 100 metrokoan igeriketako Munduko Txapelketan

Iñigo Llopis Basque Teameko beka duen igerilariaren orain arteko ibilbideak iragarri du jada. Bizkar estiloko 100 metroek osatzen dute bere proba fetitxea, donostiarraren gustukoena, eta gaur berriro erakutsi du Funchal hiriburuan, Madeiran, Penteadako Igeriketa Gune Olinpikoan.

Gaur goizean bere sailkapen-serieko lehena izan da, goizeko saioetako bigarren denborarik onena eginez bizkar erako 100 metrokoan, S8 kategorian: 1:09.05. Robert Griswold estatubatuarra izan da azkarrena, 1:07.81eko marka lortuta. Finalerako txartela poltsikoan zuela, dominak ez dio ihes egin Llopisi arratsaldean jokatutako finalean.

Iñigo Llopisek irteera ona egin du eta hasieratik Griswolden atzetik jarri da. Bigarren zuzenari estatubatuarrarekiko +2.18eko desabantailarekin egin dio aurre Llopisek baina +0.46ko abantailarekin Pipo Carlomagno argentinarrarekiko. Ohi bezala, Iñigok hobera egin du probaren bigarren zatian. Griswoldek irabazi du urrea 1:03.82ko marka eginda, Llopisek zilarra 1:07.92ko denborarekin eta Karlomagnok brontzea 1:10.91ko denborarekin.

Donostiarrak zilarrezko domina lortu zuen bizkar estiloko 100 metroetan Tokioko Joko Paralinpikoetan, brontzea Londresko Munduko Txapelketan 2019an, zilarra Dublinen egindako 2018ko Europako Txapelketan eta urrea Funchalen jokatutako azken Europako txapelketan, 2021ean, Paralinpiar Jokoen aurretik.