Ruben Vitoria eta Hans Odriozola hirugarren kanporaketara pasa dira Punta Rocaseko Munduko Txapelketako gizonen koadroan 

Kai Odriozolak ez du bigarren kanporaketa gainditu eta errepeska jokatu beharko du 

Punta Rocaseko World Surfing Games txapelketan emakumeen lehen kanporaketa amaitu denean, gizonezkoen bigarren kanporaketari ekin diote eta horretan euskal lehiakide guztiek hirugarren faserako  txartela lortu dute. Ruben Vitoriak eta Kai eta Hans Odriozola anaiek aurrera egiten jarraitzen dute Munduko Txapelketan lehiaketa nagusiaren bidetik. 

Hans izan da hiruretatik lehena uretara sartzen; bigarren txandan hasi da borrokan. Donostiako anaietan gazteenak lehen kanporaketan baino zailagoa izan du gaur txartela eskuratzea. Izan ere, txanda azken segundoetan erabaki da. Lau lehiakideek azken unera arte dena eman dute hurrengo faserako sailkapena lortzeko. Salvadorreko Bryan Pérezek bukatu du serieko lehen postuan 10.63ko puntuazioarekin, eta ondoren Hans sailkatu da 10.57 punturekin. Taipeiko Chia Chi Yu surflaria 10.27rekin erori da eta Samoako surflaria Liam Wilson 6.44rekin.

Ruben Vitoriak gutxiago borrokatu behar izan du, hurrengo kanporaketara lasaiago igaro baita. Dena dela, sei olatu hartu behar izan ditu txartela ziurtatzeko. Txandak korapilatzen doaz eta Peruko olatuaren irakurketa ez da hain erraza. Nolanahi ere, surflari guztien helburua bide nagusitik lehiatzen jarraitzea da, errepeska erabili beharrik gabe, eta bide horretan beste pauso bat eman du zarauztarrak. Rubenen olatu onenek 10.66ko puntuazioa lortu dute, beraz, aurrera egin du txandako lehen postuan, Ntokozo Maphumulo hegoafrikarraren (8.86), Reed Platenius kanadarraren (7.9) eta Oliver Rijssenbeek holandarraren (7.37) aurretik.

Kai Odriozola euskal surflarien jardunaldiari amaiera eman dio. Anaietan zaharrenak ez du bere egunik onena izan. Laugarren amaitu du bere txanda, beraz, hemendik aurrera errepeska jokatu beharko du aurrera jarraitu ahal izateko. Serieak ez du aukera handirik utzi, eta donostiarrak airekoen bidez distira egin nahi izan duenean, ez du espero zen emaitza izan. Kairi egokitu zaio bi aldiz olinpikoa izan den Peruko Lucca Mesinas maila altuko surflari batekin neurtzea indarrak; bera izan da txandako onena 14.4ko puntuazioarekin. Romeo Chavez kolonbiarrak 10.97ko puntuazioa lortu du, Oscar Urbina costarricarrak 10.3, eta 4.93ko emaitzarekin itxi du Kaik lehia. Hemendik aurrera bidea zertxobait zailagoa izango da anaietako zaharrenarentzat, baina World Surfing Games hauetan aukerak izaten jarraitzen du.