Kayakeko patruilen proban emakumeak zazpigarren izan dira eta gizonak hamahirugarren Oklahomako Munduko Txapelketan

Oklahoma Cityn jokatu den Ur Bizien Munduko Txapelketako arratsaldeko saioan patruilen probak edo taldekako probak jokatu dira kayak modalitatean.

Maialen Chourrauten, Leire Goñiren eta Laia Sorribes kataluniarraren parte-hartzearekin hasi dira emakumeak.  Zazpigarren amaitu dute 104.68ko denborarekin, bi ukitu eginda 9. eta 13. ateetan. Denboraldi osoan zehar podium postuetan egon diren arren, beteranotasuna eta gaztetasuna uztartzen dituen taldeak gaur ez du saririk jaso. Urrea, zilarra eta brontzea Australiak, Frantziak eta Eslovakiak irabazi dituzte.

Gizonezkoen lehiaketan ere Pau Echaniz, David Llorente eta Miquel Travé palistek osatutako taldea metaletatik gertuago egotea espero zen, baina egindako akatsek gehiegi oztopatu dute ibilbidea. Ukituak egin dituzte 2., 9. eta 17. ateetan, eta 13. postuan amaitu dute. Esloveniak, Suitzak eta Austriak osatu dute podiuma.