Maialen Chourraut Basque Teameko piraguistak domina batekin hasi du nazioarteko denboraldia, Taceneko Munduko Kopan brontzea bereganatuta

Pau Echaniz zazpigarren izan da gizonezkoen finalean

Maialen Chourrautek harrituta uzten gaitu behin eta berriz. Gaur, Basque Team Fundazioaren beka duen palistak bere palmares zabalaren beste orrialde bat idatzi du, denboraldiko lehen Munduko Kopan, kayak modalitatean brontzezko domina bat sinatuta.

Australiako uretan jokatu zuten iazko Munduko Txapelketan argi utzi zuen ez dituela indarra, lana eta, batez ere, bere senarekin hainbeste lotzen den piraguismoarekiko motibazioa eta grina galdu.

Sailkapen saioan Maialenek zortzigarren postua lortu du, 87.22ko denbora eginda eta penalizaziorik gabe bukatuta. Lehenengo 12 palistak pasatzen ziren jarraian jokatu den final handira. Finalean Chourraut hirugarren izan da, 83.85eko markarekin (+2.24) eta berriz ere ez du zigorrik jaso. Urrea Eva Alina Hocevar esloveniarraren eskuetara joan da (81.61) eta zilarra Jessica Fox australiarraren eskuetara (81.74).

43 urterekin, hiru domina olinpikoren jabea Tacenera joan da, lehiaketako palistarik beteranoena izanik. Nazioarteko Piraguismo Federazioak gipuzkoarra asteburuko elementu erakargarriena  dela adierazi du formalki, presioarekin duen bere idilio historikoa eta bere balioaniztasuna azpimarratuz, 2024an Krakovian zilarrarekinn eta Seun urrearekin eta iaz Pauen Kayak Crosseko diziplina ikusgarrian lortutako brontzearekin garbi utzi eta gero. 

Emakumezkoen kayakean Leire Goñi donostiarra ere aritu da, 39. postuan amaituz sailkatze-txanda.

Gizonezkoen kayakean Pau Echaniz denboraldiko Munduko Kopako lehen finalean sartu da. Eguneko lehen saioan zortzigarren izan da 77.43ko denborarekin (+2.93 azkarrenarekiko, Miquel Travé). Donostiarra gai izan da final handian postu bat hobetzeko. Pauk zazpigarren postuan amaitu du 78.40ko marka lortuta (+5.69) eta bi segundoko zigorra jasota, hirugarren atean jo duelako. Podiuma Xabier Ferrazzi italiarrak (72.72), Michal Pasiut poloniarrak (75.11) eta Jakub Krejci txekiarrak (75.62) osatu dute. Xabier, gaurko urrearen irabazlea, Maria Eizmendi palista donostiar historikoaren semea da. Mariak 1988-2000 urte biatrtean nazioartean lehiatu zen eta hiru Joko Olinpiko jokatu zituen (Bartzelona 1992, Atlanta 1996 eta Sidney 2000).

Esloveniako hiriburuan bost kontinentetako 198 atleta elkartuko dira. Tacenek 2020tik ez zuen nazioarteko zirkuitoa irekitzen, baina Kopa hiru jardunaldi bizitan zehar garatuko da aurten, eta guztira zortzi ekitaldi izango dira lehian. Estatuko taldeak denboraldiaurreko sentsazio onak berretsi eta hasieratik aurkeztuko ditu bere kartak ur bizien nazioarteko eszena menderatuko duten herrialdeen artean.

Euskadik ordezkaritza zabala dauka: Maialen Chourraut, Miren Lazkano, Klara Olazabal, Leire Goñi eta Nora López emakumezkoetan eta Pau Echaniz, Oier Diaz eta Alez Segura gizonezkoetan.