Basque Team Fundazioak bere Gabonetako Gala ospatu du Pariseko Jokoetan gertatutakoa errepasatzeko eta ziklo olinpiko berriari ongietorria emateko
Ekitaldiak azken urtean goi mailari agur esan dioten atletak omentzeko ere balio izan du
Galan izan dira Bajartxo Tejeria Legebiltzarreko presidentea, Ibone Bengoetxea lehen lehendakariorde eta Eusko Jaurlaritzako Kultura eta Hizkuntza Politikako sailburua, Gorka Iturriaga Eusko Jaurlaritzako Jarduera Fisikoaren eta Kirolaren zuzendaria, Andoni Aldekoa EiTBko zuzendaria eta Olatz Legarza Basque Teameko koordinatzailea
Basque Team fundazioak bere kirolari asko eta asko bildu ditu, enpresa eta erakunde munduko ordezkariez gain, EiTBko Bilboko egoitzako Multibox aretoan egindako Gabonetako galan. 250 pertsona baino gehiago izan dira ekitaldian, teknikariak, federazioetako ordezkariak eta babesleak barne.
Ospakizuna Pariseko Joko Olinpiko eta Paralinpikoei eskainitako bloke batekin hasi da. Tolosaldeko Ahots Gazteak abesbatzak Izaroren “Paris” abestia kantatu du, Fundazioak Jokoetan zehar egindako publizitate-kanpainaren doinu nagusia, pantailan 2024ko Jokoen irudi ikonikoenak errepasatu diren bitartean. Galaren gai nagusia ipuinek eta mundu onirikoak osatu dute, eta Didi Rodan eta Intujai Teatroren Sand style ikuskizunarekin eta Bamboodance konpainia donostiarraren hiriko baletarekin girotu da ikuskizuna.
Joseba Urkiolak, EiTB Mediako kirol zuzendariak, egindako ongietorriaren ondoren, Pariseko euskal kirolarien lana nabarmendu da. Pau Echaniz piraguista, Kauldi Odriozola eta Imanol Garciandia eskubaloi jokalariak, Bibiane Schulze eta Beñat Turrientes futbolariak, Gracia Alonso de Armiño 3x3ko saskibaloi jokalaria, Ander Cepas mahai-tenis egokituko jokalaria eta Iñigo Llopis igerilaria izan dira sarituak.
Gero, agurren txanda iritsi da. Kirolari askok agur esan diote goi mailari zikloaren amaiera aprobetxatuz. Carlos Tobalina pisu jaurtitzailearen, Lourdes Oyarbide txirrindulariaren, Maialen Oiartzabal eskiatzailearen, Joan Crespo eta Aitor Gorrotxategi piraguisten, Teresa Errandonea hesi-lasterkariaren, Teresa Gorospe gimnastaren, Uribarri Barrutieta errugbi jokalariaren, Illart Zuazubiskar pistard-aren eta Eneko Carretero eskalatzailearen ibilbideak nabarmendu dira.
Olatz Legarza Basque Teameko koordinatzaileak kirolariei fundaziotik eskaintzen zaizkien zerbitzu integralak gogorarazi ditu, eta arreta berezia jarri du “Laneratzea” proiektua azaltzeko, etapa akademikoan eta lan-munduan sartzean laguntzen diena.
Galaren azken blokeak skater eta rider-en emanaldi bat izan du, Freeskate Academyk gidatuta, ikusentzulegoa hurrengo ziklo olinpikoan kokatzeko eta udako kirolei dagokienez, fundazioaren hurrengo erronka izango dena aurkezteko: 2028ko Los Angeleseko Jokoak. Joko jasangarriak izango dira, askatasunari eta globalizazioari oso lotuak, hiri estatubatuarraren estiloarekin bat eginez.
Lehen lehendakariordea eta Eusko Jaurlaritzako Kultura eta Hizkuntza Politikako sailburua den Bengoetxeak itxi du ekitaldia, goi-mailako kirolak eragile sozioekonomiko eta inklusio-elementu gisa duen garrantzia gogoratuz eta kirolariei ziklo honetan ilusio berarekin lan egiten jarraitzeko animoak emanez: “Oraindik lan asko dago egiteko eta horregatik gonbitea luzatzen dizuet guztioi, Basque Teamekin batera, Euskadiko goi-mailaren historia idazten jarraitzeko”.
