Basque Team Fundazioak kudeaketa aurreratuaren brontzezko A ziurtagiria jaso zuen atzo
Basque Team Fundazioak brontzezko A- Kudeaketa Aurreratuaren Euskal Saria jaso du. Aitortza honekin praktika aurreratuak dituzten eta bere interes taldeen -bezeroak, pertsonak, akziodunak eta gizartea besteak beste- asebetetze orekatua bilatzen duten erakundeak saritzen dira. Aitortza atzo banandu zen Bilboko Euskalduna Jauregian.
Eusko Jaurlaritzak eta EiTBk 2007an goi-mailako euskal kirola sustatzeko sortutako fundazioa da Basque Team eta euskal kirolarien nazioarteko partaidetza eta bikaintasun emaitzak bilatzea eta bultzatzea du helburu. 17 urte hauetan, Fundazioak 258 kirolariri eman die beka.
Basque Teamek bere kudeaketa sistema ebaluatzeko eta hobetzeko Kudeaketa Aurreratuaren Eredua erabiltzen du erreferente gisa, eta saria lortu du, EUSKALITeko Ebaluazio Klubeko azterketa gainditu ostean.
Kudeaketa Aurreratuari Euskal Saria
Kudeaketa Aurreratuaren Euskal Sariaren helburua, Euskadiko erakundeen artean Kudeaketa Aurreratuaren garrantzia zabaltzea da, erakunde eta ingurunearen lehiakortasun jasangarria lortzeko.
Eusko Jaurlaritzaren aitortza hauek, kudeaketa-sistemaren etengabeko hobekuntza eta aurrerapenarekin konpromisoa erakusten duten Euskadiko enpresek, hezkuntza-zentroek, osasun-zentroek eta gainerako sektoretako erakundeek, publiko zein pribatuek jasotzen dituzte. Aitortzak EUSKALITen bidez ematen dira, honek kudeatzen dituen ebaluazio-prozesuen bitartez.
Sari horien helburua bikoitza da:
– Kudeaketa mailan aurreratuen dauden erakundeak identifikatzea, beste erakunde batzuen pizgarri eta erreferentzia izan daitezen.
– Publikoki aitortzea erakunde horiek egindako ahalegina eta lortu duten kudeaketaren aurrerapen-maila.
Aintzatespen hauek lortzeko erakundeak bere kudeaketa sistemaren garapen maila jakin bat duela erakutsi behar du. Horretarako, EUSKALITek Kudeaketa Aurreratuaren Eredua erreferentetzat hartzen duten Kanpo Kontraste eta Kanpo Ebaluazio zerbitzuak eskaintzen ditu.
Zerbitzu bietan, kanpoko ebaluatzaile talde batek erakunde baten kudeaketaren azterketa orokorra eta sistematikoa egiten du, ikuspegi objektiboa eskainiz, Kudeaketa Aurreratuaren Ereduaren arabera.
Azterketa hori EUSKALITeko Ebaluazio Klubeko pertsona-taldeek egiten dute. Klub hori 1.500 pertsona inguruk osatzen dute, gehienak gerentzia- edo zuzendaritza-postuetan, eta EUSKALITekin altruismoz lan egiten dute, kudeaketan dituzten ezagutzak eta esperientzia partekatuz.
