'Chefo' Basterra eta Rafa Vilallongaren selekzioak agur esan dio brontzeari Pariseko Jokoetan
Rafael Vilallonga
Laugarren postuan amaitu dute eta diploma olinpikoa eramango dute etxera
Basque Teameko bekadunak diren ‘Chefo’ Basterra eta Rafa Vilallongaren belar-hockeyko taldeari brontzezko dominak ihes egin dio Parisen. Indiaren aurkako partida liskartsu batean, 2 eta 1eko porrota jaso dute, azken laurdenean egindako akatsak zuzentzea lortu ez dutelako.
Espainiak, 2008ko Beijingetik lortzen ez zuen domina olinpiko baten bila zebilela, abantaila hartu du 18. minutuan Marc Mirallesen golari esker. Hala ere, Indiak berdindu egin du 30. minutuan eta gero, 33.ean, Harmanpreet Singhek berak aurreratu du bere taldea markagailuan.
Azken laurdena erritmo ezberdinarekin hasi da, Espainiak inposatzen zuen horretan, golaren premia handiagoarekin. Basterra eta Vilallongaren taldea erasoan saiatu da, baina esparru horretan eraginkortasunik ez izatea izan da neurketa osoan zehar izan duen oztopoa. Horrek eragotzi dio emaitza hobea: neurketa osoan jaurtitako 10 penalty Korner-etatik, ez dute bat bera ere asmatu, eta Indiak birritan atera die probetxu.
Hala, etsi-etsian, Max Caldasek atezaina arku azpitik kentzea erabaki du, erasoan beste gizon bat gehitzeko. Hala ere, ahalegin guztiak alferrikakoak izan dira. Azken bi minutuetan hiru penalti korner jaurti badituzte ere, hasi bezala amaitu da lehia, ‘nahi eta ezin’.
Indiak urrea nahi zuen, baina ezin izan du finala jokatu, finalerdietan Alemaniaren aurka galdu baitzuen. Hala ere, 2024an Parisetik esku hutsik ez joatea ospatu dute indiarrek, Tokio 2020an lortutako emaitza errepikatuz.
Bestalde, golfean, ez dira Carlota Cigandak amestutako Olinpiar Jokoak izaten ari. Golf olinpikoaren bigarren jardunaldian, +6ko emaitza lortu du, parez gainetik, eta horrek +7ko azken puntuazioa utzi dio. Lehen zuloan bogey egin du, eta hirugarrenean beste bat. Lehen erdiko gainerakoa parez azpitik egin du. Bigarren zatian iritsi da hondamendia iruindarrarentzat: 5 bogey 9 zulotan, birdie bat eta 3 kolpe paretik gora. Eguna 47. postuan amaitu du, sailkapenaren beheko aldean.
