HORMATZARRERA LEHEN ALDIZ GERTURATU DA PAIJU PEAK 2013 ESPEDIZIOA
Asteazkenan oinarrizko kanpalekua ezarri zuten eremura heldu eta gero, Alberto Iñurrategik, Juan Vallejok eta Mikel Zabalzak osatzen duten Paiju Peak 2013 espedizioak ostegunean ekin zion aurretik duten erronkarako prestaketa lanari. 3 orduko ibilaldia burutu zuten 1.000 metro egiteko, nahiz eta paretaren magalera iristeko beste 500 metroko desnibela igo beharko duten.
Basque Team-eko mendizaleek igoera nahiko erosoa burutu zuten, 6.610 metroko mendia hegoaldeko aurpegitik. Zain duten harrizko hormatzarrera egindako gerturaketan ordea ezin izan dute berau ondo aztertu, erasoa noiz joko duten aztertzeko beharrezkoa dena. Paretaren oinarrian (4.800 metrotan) egon beharko dute horretarako, maiz ematen diren arroka eta izotz luiziak saiestu ahal izateko eta segurtasuna bermatzeko.
Azken komunikazioan azaldu dutenez, Iñurrategi, Vallejo eta Zabalza larunbata arratsaldean aterako dira oinarrizko kanpalekutik berriz ere 1.000 metroko desnibela igotzeko, bertan lo egiteko asmotan. Igandean, goizean goiz, paretaren oinarrira heldu nahi dute lehen azterketa sakon bat egiteko. Hurrengo egunean itzuliko lirateke kanpalekura atseden hartzeko eta astelehenean bertan paretara bueltatzeko asmoa azaldu dute eskalada hasiko duten eremuraino materiala garraiatzeko.
Basque Team taldea osatzen duen Iñurrategi, Vallejo eta Zabalza hirukoak zazpigarren egitasmoa izango du elkarrekin. 2009. urteaz geroztik, goi mailako hiru eskalatzaileok erronka ederrak hartu dituzte miran: Makalu, Hornbein, Broad Peak, Nuptse eta Antartikako zeharkaldia kometa bidez tiratutako lerekin. Aurrekoetan bezala BBK/Kutxabank-ek eta EDP Naturgas-ek babestuko dute espedizioa.
PAIJU
