Nadia Erostarbe Basque Teameko surflariak ez ditu Huntington Beacheko Munduko Txapelketako final-laurdenak gainditu, baina txapelketan jarraitzen du, bigarren aukerakoari esker

Pauline Ado Angeluko kirolaria finalerdietan sartu da

Gidoia behin eta berriz errepikatu da estatuko selekzioarentzat Huntington Beach-eko Munduko txapelketan. Adur Amatriainek eta Garazi Sanchezek azken unean galdu zuten atzo euren txandetan, eta gaur gauza bera gertatu da Nadia Erostarbek final-laurdenetan jokatu duen txandan.

Basque Teameko kirolariak Sally Fitzgibbons australiarra, Sanoa Dempfle-Olin kanadarra eta Rachel Presti alemaniarra zituen aurkari. Nadiak, likra zuriz jantzita, oso goiz surfeatu du bere olaturik onena, 6.17koarekin baloratutako olatua. Puntuazio hori lortu ondoren, beste serie bati itxarotea erabaki du, beste kalitatezko olatu bat ekar ziezaion, baina denbora igaro da hori gertatu gabe. Bien bitartean, Fitzgibbons beteranoa eta Presti alemaniarra saiatu dira ahalik eta olatu gehien eta punturik onenak lortzen. Australiarra lehen postuaz jabetu da, eta une horretatik aurrera lehia beste hiru surflarien artean gertatu da, finalerdietarako txartela ematen zuen bigarren postua eskuratzeko. Nadia bigarren izan da txandako azken minutura arte. Kanadarrak 4.17 puntu zituen aurreko olatu batetik, eta 4.40 puntu batu ditu bigarren jartzeko eta Nadia hirugarren postura bidaltzeko.

Azken hasperenean galtzeak hautsita utzi du Erostarbe, baina bere onera etorri behar izan du, hiru ordu geroago uretara itzuli behar izan baitu errepeskako bere lehen txanda jokatzeko, lehiaketa paralelo honetako seigarren txandari dagokiona. Errepeskak lehiaketa nagusitik kanpo dauden surflariei bigarren aukera bat ematen die. Eguneko bigarren emanaldian Nadiak askoz seguruago surfeatu du eta erabaki hobeak hartu ditu. Bere bi olatu onenek 5.33 eta 4.57 puntu lortu dituzte, eta Vahine Fierro frantziarraren, Francisca Veselko portugaldarraren eta Zoe McDougall estatubatuarraren aurretik amaitu du. Emaitza horri esker, Nadia Erostarbek bizirik jarraitzen du Huntingtongo Munduko Txapelketan.

Bestalde, Pauline Ado Angeluko surflariak ez du hutsik egin final-laurdenetako kanporaketan. Ez dio inoiz lan egiteari utzi, nahiz eta bere txandak iraun duen hogeita bost minutuetan olatuen eskaintza nahiko eskasa izan den. Pauline izan da olatu gehien hartu dituen txandako surflaria; ez du anbizioa galdu, hasieratik aurretik joan den arren. Teresa Bonvalot portugaldarra eta Dominic Barona ekuadortarra izan dira bigarren eta hirugarren, hurrenez hurren. Mathea Dempfle-Olin kanadarrak laugarren bukatu du.

Hurrengo kanporaketan, finalerdietan, Adok indarrak neurtuko ditu Gabriela Bryan eta Kirra Pinkerton estatubatuarrekin eta Sanoa Dempfle-Olin kanadarrarekin.

Pauline Adok Huntingtonera joan den Basque Teameko komunikazio taldeari adierazi dionez, gaur egun bere kirol helburu nagusia 2024ko Pariseko Jokoak dira. Tokioko Jokoetan lehiatu zen, final-zortzirenetara iritsita, baina Japoniako olatuak ez du zerikusirik Teahupooko olatu mitiko eta hainbeste desiratutakoarekin.