Eunate Aguirre Santa Catarinan.
Sasoiko dagoela berretsi du Eunate Aguirrek Brasilgo Santa Catarinan lortutako bigarren postuarekin.
IBA World Tour zirkuituan ari denetik denboraldi hasiera ikusgarriena burutzen ari da sopeloztarra. Gutxigatik ez du irabazi denboraldiko bigarren proba, Katherine Melo Bodyboarding Pro 2009-a. Aukeratutakoen artean dago Brasilgo saioa, Grand Slameko proben barruan eta honek gainontzekoak baino puntu gehiago jartzen ditu jokoan. Finalerako bidean Eunatek nahiko erraz gainditu zituen bere arerioak, titulurako zenbait faborito barne. Catarina Sousa eta Rita Pires utzi zituen bazterrean, final zortzirenetan eta final laurdenetan hurrenez hurren. Finalaren atarian Eunatek puerto ricoko Natasha Sagardia hartu zuen mendean eta finalean Neymara Carvalho, egungo munduko txapelduna, ezin izan zuen menderatu. Santa Catarinan egindako lan bikainaren ondorioz sailkapen orokorreko 2. postuan jarraitzen du BAT Basque Teameko kirolariak, 2.580 puntu dituela eta Neymara Carvalho brasildarrarengandik 15 puntura.
