Imanol Rojo eta Peio Añarbe iraupen-eskiatzaileak dira 'BAT To Milano-Cortina' saioaren laugarren ataleko protagonistak

Dokumental saila osatzen duten sei kapituluak igande goizetan eskaintzen dira ETB1eko ‘Helmuga’ programan (11:30)

Aste honetan, Basque Team Fundazioak bultzatutako ‘BAT To Milano-Cortina’ telesailak iraupeneko eskia izango du protagonista, ‘Denak zentzua hartzen duenean’ izeneko atalean.

Iraupen eskia dena da Peio Añarbe eta Imanol Rojorentzat, nahiz eta bakoitzak bere bidea duen diziplina honetan. Peiok bere aitaren eskutik eman zituen lehen pausoak. Aita kirolari profesionala izan zen eta gaur egun Txileko selekzioaren entrenatzailea da. Peiok orain bere ametsa lortu nahi du, olinpikoa izatea eta txapelketa horretan domina bat lortzea, arrautza-oskoletik irtenda erronka eta etapa berriei aurre eginez.

Imanol Rojo, berriz, beste bizi-une batean dago. Azken zikloan Estatuko taldearen egituratik kanpo geratu ondoren, bere burua berrasmatu behar izan du, eta lehiaketetan bezala, bulegoetan ere aurrera egiten ikasi behar izan du, finantziazioa eta babesletza bilatzeko. Lehen Jokoak jokatu zituenetik gauzak asko aldatu dira. Baita prestaketan ere, gaur egun oso sartuta baitago, adibidez, rollerskia euren kasuan. Milano-Cortina d’Ampezzoko Jokoetako iraupen-eskia Val di Fiemme haranean jokatuko da, eta Imanolek Munduko Kopako emaitzarik onenak lortu ditu bertan. Bere laugarren Jokoak izango liratekeenak etxekoekin batera bizitzeak, momentua partekatzeko eta gozatzeko, indarra emango lioke eta une horretan guztiak zentzua hartzea eragingo luke horrek.

‘BAT To Milano-Cortina’
2026ko Milan-Cortina d’Ampezzoko Joko Olinpiko eta Paralinpikoetan lehiatzeko borrokatu diren euskal kirolarien ahalegina Euskal Telebistan abenduaren erdialdetik astero eskaintzen diren erreportajeetan islatzen da. ‘BAT To Milano-Cortina’k, ‘BAT To Rio’, ‘BAT To Pyeongchang’, ‘BAT To Tokio’, ‘BAT To Beijing’ eta  ‘BAT To Paris’ programen lekukoa hartu du, aipatutako saioek aurreko udako eta neguko hitzordu olinpiko eta paralinpikoetan parte hartu zuten euskal kirolariak aurkeztu baitzituzten, antzeko formularekin.

Erreportaje sorta honek ikus-entzunezko istorio handien osagaiak biltzen ditu, kirolarien ametsak, erronkak eta gainditzeko irrikak kontatuta. Programak pertsonen profil hori du ardatz, ikuslea haien borrokan eta asmoetan inplikatzeko helburuarekin.

‘BAT To Milano-Cortina’, ‘Korima Films’ ekoiztetxeak egina, astero eskaintzen da pantaila txikian, igandeetan, ETB1eko ‘Helmuga’ saioaren barruan. Saio bakoitzak 10 minutu inguruko erreportaje bat du. Beraz, Joko Olinpikoak eta Paralinpikoak gertatu baino aste batzuk lehenago, ikus-entzuleek Italiako hirietan lehiatzeko sailkapena lortzeko borrokan aritu izan diren euskal kirolarien zati handi bat ezagutzeko aukera dute.

Programak irudi ikusgarriak eta ikus-entzunezko baliabide modernoenen erabilera barne hartzen ditu.

Basque Team Fundazioa
Fundazioa 2007an sortu zuten Eusko Jaurlaritzak eta Euskal Irrati Telebista (EiTB) erakunde publikoak. Hasieran bezala, BASQUE TEAMen helburua baliabide ekonomikoak eta era guztietako zerbitzuak (medikoak, teknikoak, psikologikoak, komunikaziokoak, laneratzekoak eta ikasketen arlokoak…) ematea da, profesionalak ez diren euskal kirolariei, haien parte-hartzea errazteko eta nazioarteko lehiaketarik gorenetan bikaintasun-emaitzak lortzeko.