Majida Maayouf Basque Teameko kirolaria, Europako txapeldunorde maratoian

Duela hamarkada bat baino gehiagotik Agurainen bizi den atleta marokoarrak, gainera, urrea zintzilikatu du taldeka

Majida Maayoufek bigarren postua lortu du Bruselako helmugan, eta zilarra eskuratu du maratoiaren proban, errepideko lehen Europako Txapelketetan. Basque Teameko kirolariak 2h27:41eko kronoarekin amaitu du lasterketa, Aguilar de la Fronteran bizi den Fatima Ouhaddou atleta marokoarraren atzetik. Jatorri kenyarra duen Lonah Chemtai Salpeter israeldarrak osatu du podiuma.

Majida Maayouf Belgikara joan zen taldearen gidaritza eramateko helburuarekin eta garaipena lortzeko faboritoetako bat zen. Txapelketa hauetan maratoi eta maratoi erdiko proba tradizionalez gain 10 kilometrokoa ere jokatu dute aurten.

Basque Team Fundazioaren beka duen kirolaria Europako Txapelketara iritsi zen 2024ko goi mailako denboraldi baten ondoren. 2024ko Parisko Joko Olinpikoetan, Maayouf izan zen estatu mailan helmuga zeharkatu zuen lehen kirolaria, 17. postuan iritsiz; 2023ko Valentziako maratoian, bestalde, bere marka nazionala haustear egon zen, bere hirugarren marka pertsonalik onena lortuz: 2:21:43, segundo batzuk baino ez zitzaizkion falta izan 2:21:01 marka historikoa gainditzeko. Bruselako Europako Txapelketa honetan maratoi kontinental batean estreinatu da.

Bere errendimenduaren inguruko itxaropenak handiak ziren, eta gaur erakutsi du kinieletan zuen presentzia erabat justifikatuta zegoela.

Gaurkoan Majida lehen postuan jarri da ibilbideko 15. kilometroan, eta horri eutsi dio maratoi erdia osatu arte.

15. kilometroan egindako erasoan faboritoen taldea desegin da. Une horretan, lasterketaren burua sei emakumezkoetan zentratu da, baina, berriz ere, Maayoufek eraso indartsua egin du, eta 15 segundoko aldea lortu du besteekiko. Hala ere, minutuek aurrera egin ahala berdintasuna nagusitu da berriro.

30. kilometrotik aurrera, lasterketaren zuzendaritzan Lonah Salpeter israeldarra, Hanne Verbruggen, Majida Maayouf eta Fatima Ouhaddou izan dira. Lau korrikalari horien artean atera behar zen Europako txapelduna, baina zalantza ugari zeuden erantzukizuna nork hartuko zuen. Aguilar de la Fronteran bizi den atletak, amaierarako 6.000 metroren faltan, nahikoa ez zen erritmoa markatzen utzi die israeldarrei eta belgikarrei.

Azken txanpan, Majidak eta Fatimak eraso bortitza egin dute, Lonah eta Hanne atzean utzita. Hiru kilometroren faltan, Ouhaddouk dena eman du Bruselako kaleetan, garaipenaren bila bakarrik joanez eta azkenean garaipena lortuz, 2h27:14ko denborarekin.

Bere atzetik, Majida Maayoufek sufritu du zilarrezko dominaren defentsan jasan dezakeen guztia. Azken kilometroan arretaz jarraitu die lehiakideei, lepoa etengabe biratuz, harrapatuko ote zuten ikusteko. Ez dute egin eta Maayoufek zilarra eskegi du 2h27:41eko kronoarekin. Podiuma Lonah Chemtai Salpeter israeldarrak osatu du, 2h28:01 denboran helmuga zeharkatuz.

Urrea taldeka

Banakako zilarrezko dominaz gain, Majida Maayoufek urrea poltsikoratu du taldeka, Ouhaddou Europako txapeldunarekin eta Esther Navarreterekin batera.

Esther Navarretek zazpigarren postuan bukatu du proba, 2h29:49ko denbora eginez. Navarrete beti egon da top 10ean, erritmoari eutsiz eta azken kilometroetan ausardiaz errematatuz. Bere sendotasunari esker, Espainiak txapelketako hiru denborarik onenak lortu ditu eta urrea erdietsi du nazioen sailkapenean, Israel eta Italia gaindituta.

“Ez da erraza izan, zirkuitua hasieran oso gogorra zelako, baina, egia esan, bultzada bat eman dit buruan lau geundela ikusteak, azkenean nor nagusituko zen ikusteko zalantzak ere sartu zaizkidan arren. Harrigarria izan da banakako eta taldekako domina irabaztea. Gure izena inskribatu ahal izan dugu edizio honetan eta ea hurrengoetan ere berdina gertatzen den” adierazi dio Majidak Espainiako Atletismo Federazioari lasterketa amaitzean. Egutegian gorriz markatutako hurrengo helburua irailean jokatuko den Tokioko Munduko Txapelketa izango da.