basqueteam fomenta el deporte de alto nivel del País Vasco

Webgune honek berezko eta beste bitarteko batzuen Cookie-ak erabiltzen ditu informazioa jaso eta gure zerbitzuak hobetzeko. Nabigatzen jarraitzeak horien instalazioa onartzea dakar. Erabiltzaileak bere nabigatzailea konfiguratzeko aukera dauka, eta nahi izanez gero, bere disko gogorrean instalatzea ekidin dezake, horrek webgunean nabigatzeko arazoak sor ditzakeela aintzat hartu behar duen arren.

Onartu Nola konfiguratu
AlbisteakSnowboard-a 15
martxoa
2024

Lucas Eguibar Basque Teameko snowboarderra etxera itzuli da Innsbruckeko ebakuntza arrakastatsuaren ondoren

Donostiarrak bi hilabetez eraman beharko du ortesia, eta, ondoren, errehabilitazio-aldi aktiboagoa hasiko du

Lucas Eguibarrek prentsaurrekoa eskaini du gaur Donostiako Eusko Jaurlaritzako egoitzan, Olatz Legarza Basque Team Fundazioko koordinatzailearekin batera, Innsbrucketik (Austria) etxera itzuli ostean. Bertan ebakuntza egin diote, martxoaren 9an izan zuen ezker oineko Akilesen orpazurdaren haustura sendatzeko.

Munduko Kopan sei garaipen eta 20 podium dituen 30 urteko Eguibarrek, larunbatean izan zuen lesioa, Italiako Cortina d’Ampezzoko estazioan jokatutako proban. Zortzigarren amaitu zuen Eliot Grondin kanadarrak irabazi zuen proban (kanadarrak lidertza sendotu zuen bosgarren garaipena erdietsita).

‘Luki’, Munduko snowboardcross txapelduna 2021ean, txapeldunorde bikoitza 2017an eta Munduko Kopako irabazlea 2015ean, erori egin zen final txikia jokatzen ari zela, bihurgune batean barrualdetik aurrera egiten saiatuta. Donostiarrak zortzigarren bukatu zuen Cortinan, baina postua garesti atera zitzaion. Gipuzkoako txapelduna herri italiarrean aztertu zuten lehen instantzian eta ez zioten lesio larririk antzeman, baina mina sentitu zuenez, Innsbruckera eraman zuten, Tiroleko hiriburura. Han Akilesko orpazurdaren haustura diagnostikatu zioten, eta ebakuntza egin zioten astearte arratsaldean. Arazoa ahalik eta lasterren konpontzen saiatu ziren, pistetara itzuli ahal izateko aurretik izango duen errekuperazio luzeari ahal bezain pronto ekiteko.

“Kontsolazio finalean izan zen, final txikian. Egia esan, oso azkar nindoan. Hasieran laugarren nindoan eta, jaitsieran aurrera egin ondoren, lehenari erasotzen saiatu nintzen. Bihurgune baten aurretik dubbi batzuk zeuden, eta oso azkar nindoanez, luze joan nintzen. Eta erori egin nintzen. Eta, erortzean, orkatilari tira egin nion. Egia esan, oso azkar goaz, eta erorikoaren abiaduragatik, hasieran ez nintzen konturatu lesioaren irismenaz. Gero, atxikipena eta ohola kendu nituenean, ia lurrera erori nintzen. Orkatila oso zurrun nuela nabaritzen nuen, eta orduan bota nuen neure burua lurrera”, esan zuen Eguibarrek Innsbrucketik, Alex Aguirre bere fisioterapeuta ondoan zuela.

Austrian egindako ebakuntzak arrakasta handia izan zuen. Atzo, osteguna, goizean, orbaina berriro aztertu eta garbitu, eta dena oso ondo zegoela ziurtatu zuten; beraz, orain hurrengo urratsa errehabilitazio prozesua martxan jartzea da. Lehen bi hilabeteetan Lucasek hankan jarri dioten ortesia eraman beharko du, aldaketa txikiak gehituz (eta bosgarren astetik aurrera mugimendu pixka bat eginez), eta zortzi aste horien ondoren, errehabilitazio-aldi aktiboena hasiko da.

Hiru aldiz olinpikoa izan da Lucas Eguibar (Sotxi 2014, Pyeongchang 2018, Beijing 2022) eta bi diploma irabazi ditu Errusia eta Txinako hitzorduetan lortutako zazpigarren postuengatik. Donostiarrak  Munduko Kopako sailkapen nagusian postuak igotzea zuen helburu ezbeharra gertatu zenean baina denboraldia galduko du. Iaz bigarren izan zen Munduko Kopako sailkapen nagusian eta aurten Les Deux Alpesen eskuratutako hirugarren postua eta Sierra Nevadan erdietsitako laugarren postua izan dira lortutako emaitzarik onenak. Hurrengo hitzordua Montafonen (Austria) zuen asteburu honetan, eta hurrengoa Mont Sainte-Anneko (Kanada) finaletan hurrengo larunbatean eta igandean, martxoaren 23an eta 24an.

“Berriro ondo egoteko, gutxienez, sei hilabete beharko ditudala esan didate; beraz, hemendik aurrera gauzak lasai hartu beharko ditut, eta datorren denboraldian pentsatu” adierazi du Lucas Eguibarrek, etsita baina itxaropentsu.

“Lucasek sekulako indarra du, bere bizitzako beste une zail batzuetan erakutsi du, eta Basque Teametik konfiantza osoa dugu eta badakigu inoiz baino sendoago itzuliko dela. Fundazioa berarekin egongo da behar duen guztian laguntzeko” ziurtatu du Olatz Legarzak.