Maialen Chourrautek finalerdietarako txartela lortu du Augsburgeko Munduko Txapelketan
Basque Teameko palistak bigarren jaitsiera behar izan du, horretan bederatzigarren postuan amaitu duelarik
Urtebete pasa da Maialen Chourrautek Tokioko Jokoetan zilarrezko domina lortu eta bere hiruko olinpikoa biribildu zuenetik. Jendeak oraindik erretinan gordetzen du irudi hori, eta lasartearra berriro txapelketetan ikusteko irrikan zegoen. Pariseko Jokoei begira, gipuzkoarrak aurten etenaldi bat egitea eta ebakuntza gelatik pasatzea erabaki zuen joan den otsailean, bere sorbalda garaiz konpontzeko Frantziako hiriburuko hitzordu handiari begira. Eslalom piraguismoko Augsburgeko Munduko Txapelketa izango da beraz denboraldi honetako bere lehen lehiaketa. Alde batetik Maialen Alemaniara iritsi da lehiakideekin berriro indarrak neurtzeko gogoarekin, baina eta bestetik, zuhurra da badakielako oraindik borroka lasaitasunez hartzeko beharra duela.
gaurko jardunaldia bukatzean Basque Teameko komunikazio taldeari esan dionez, oso pozik dago egindako lanarekin, hemen egotea lorpen handia delako. Bestalde, badaki hurrengo hilabeteetan xehetasunak leundu eta gogor borrokatu beharko dela, aurkariak inoiz baino azkarragoak izaten ari direlako.
Gaur Maialen Chourrautek bi jaitsiera behar izan ditu Augsburgeko Munduko Txapelketako finalerdietarako sailkapena lortzeko. Egin duen lehen jaitsieran, Chourrautek 24. postuan bukatu du, 105.77ko denborarekin (+7.44 Stefanie Horn italiarrarekiko) eta zigorrik gabe. Lehenengo 20ak zuzenean sailkatzen ziren. Bigarren jaitsieran 10 plaza zeuden jokoan eta Maialen bederatzigarren izan da, 104.17ko denborarekin (+5.30 Lena Teunissen holandarrarekin alderatuta) eta 2 puntuko penalizazioarekin 20. ateko ukitu batengatik. Emaitza honi esker larunbatean jokatuko duten finalerdirako sailkatu da. Finala ere larunbatean bertan jokatuko da.