Zilarra eta sailkapen olinpikoa Peñarentzat Szegedeko Munduko txapelketan
Basque Teameko Iñigo Peña palistak eta bere ontzikideak, Paco Cubelosek, berriz ere zilarra jantzi dute Munduko txapelketan, oraingoan Szegeden. Iaz Portugalen egin zuten moduan, nazioarte mailan erreferentzia direla erakutsi dute berriro eta gaur egun Alemania baino ez dago haien aurretik K2-1.000 metrokoan. Munduko Kopetan eta Europako eta Munduko txapelketetan arrakasta asko pilatu dituzte azken hiru urteetan; horien artean Montemor O´Velhoko Munduko txapelketako zilarra eta Belgradeko Europako txapelketako brontzea 2018an.
Peñak eta Cubelosek irteerak landu dituzte aurten eta hobekuntza nabaria da. Gaur aurreko tokietan kokatu dira hasieratik eta postu horiei eutsi diete azken metroetan berriz ere podiumera igotzeko. Domina lortzea zen helburuetako bat eta bestea K2-1.000 metrokoaren sailkapen olinpikoa. A finaleko lehen sei ontziek lortu dituzte 2020ko Tokioko Jokoetarako txartelak.