basqueteam fomenta el deporte de alto nivel del País Vasco

Webgune honek berezko eta beste bitarteko batzuen Cookie-ak erabiltzen ditu informazioa jaso eta gure zerbitzuak hobetzeko. Nabigatzen jarraitzeak horien instalazioa onartzea dakar. Erabiltzaileak bere nabigatzailea konfiguratzeko aukera dauka, eta nahi izanez gero, bere disko gogorrean instalatzea ekidin dezake, horrek webgunean nabigatzeko arazoak sor ditzakeela aintzat hartu behar duen arren.

Onartu Nola konfiguratu
Alpinismoa 06
ekaina
2016

Iñurrategik, Vallejok eta Zabalzak Wopeak egitasmoaren zortzigarren urratsari ekingo diote EDP-Basque Teamen babesarekin

WOPeak proiektuko alpinistak, Alberto Iñurrategi, Juan Vallejo eta Mikel Zabalza, Pakistanera abiatzear dira. Helburua: Gasherbrum mendiak. Mendigune ikusgarri hartan daude munduko mendi altuenetako hiru

Mendizaleek plan irekia eta malgua eramango dute eta mendiaren beraren eta eguraldi baldintzen arabera erabakiko dute zer egin

2014an Paiju Peak eta 2015ean Chamlang igo ondoren, hiru alpinistek maila altuko beste proiektu bati ekingo diote, gaixotasun neurodegeneratiboen aurkako borrokan The Walk On Project (WOP) Fundazioak bultzatutako egitasmoaren azken etapan.

Iñurrategik, Vallejok eta Zabalzak WOPeak egitasmoaren zortzigarren etapari ekingo diote uda honetan, ilusio bereziz ekin ere. “Egokiera ezin hobea dugu proiektu hau jarduera polit batekin ixteko, Himalaiara aurrenekoz joan ginenen hartan adinako ilusioa baitugu asmo honetarako”, adierazi du Iñurrategik.

Gaur goizean prentsaurrekoan, nora doazen eta zer asmo duten jakinarazi dute hiru alpinistek. Ekainaren 7an abiatuko dira Bilboko aireportutik Pakistan aldera. Gasherbrum mendilerroa da haien jomuga (“mendi ederra”, baltieraz). Baltoro glaziarraren ipar-ekialdean kokatutako mendi multzo bat da, Karakorum mendikatean (Himalaia). Mendigune ikusgarri horretan daude munduko mendi altuenetako lau: K-2 (8.611 m), Gasherbrum I (8.068 m), Broad Peak (8.047 m) eta Gasherbrum II (8.035 m).

Erronka honetan bidelagun izango dute Jon Herranz kamerari profesionala, bere azken lanengatik mendiko hainbat zinema jaialditan oraindik orain saritua. Espedizioaren nondik norakoak iruditan jasotzeaz arduratuko da Herranz espedizio honetan.

PLAN IREKIA: HAINBAT AUKERA

Eta zein da plana? Mendizaleak plana zabalik dutela abiatuko dira, baina hainbat aukera aztertuak dituzte jada. “Baldintzen arabera, han bertan hartuko dugu erabakia”. Ohikoa duten filosofiari leial, mendiaren eta erronkaren neurrira egokituz, eguraldi baldintzen eta haien aukera eta indarren arabera, hirurak bakarrik ekipamendu ahalik eta arinenarekin, estilo alpinoan, inork gutxik urratutako bideetan. Bide berriak bilatzea, ohiko ibilbideetatik ateratzea, hori baita, finean, zailtasuna, konpromisoa eta jardueraren interesa areagotzeko bidea.

Plan irekia izanik, hainbat aukera dituzte:

1. G-II eta G-I gailurrak kateatzea, zeharkaldian (BKra jaitsi gabe).
2. G-I igotzea bi ibilbide konbinatuz.
3. G-II oso ezohiko bide batetik igotzea (1975eko bide frantziarra).

“Aukera desberdinak dira, baina guztiak bat datoz bilatzen dugun himalaismoarekin”, azpimarratu du Iñurrategik. “Askatasuna dugu plan irekiarekin joateko eta hiru ideia horietakoren bati heltzeko; zein baino zein ederragoa da asmo bakoitza eta han bertan erabakiko dugu. Gure onena ematera behartuko gaituen igoera bat egiten saiatuko gara”.

Mikel Zabalzaren iritziz, erronka honek “ia dena” dauka: zailtasuna, altuera, esplorazioa, estilo alpinoa, zalantza asko… “Zer baldintza eta arrisku antzeman eta onar ditzakegun, horren arabera erabakiko dugu azkenean zer ibilbideri jarraitu”.

Prestakuntza tekniko garrantzitsua
Alpinisten prestakuntzaren helburu behinenak haien errendimendua handitzea eta osasunarekin eta errendimendu horrekin loturiko arrisku-faktoreak murriztea dira. “Espediziora abiatu aurretik egiten den lanaren funtsa da prestakuntza fisiko egokia eta oinarri orokor ona sortzea. Altuera jakin batetik aurrera, errekuperazio-prozesuak oso mugatuak dira eta, horrenbestez, oso garrantzitsua da baldintza fisiko on-onean egotea, gailur horiek ahalik eta azkarren eta seguruen igotzeko eta jaisteko”, azaldu du Aitor Alberdik, Basque Teameko teknikariak eta alpinisten prestatzaileak.

Osagarri gastronomikoak Eneko Atxaren eskutik
Altuerak arnasketa zailtzen du eta ahalegin fisikorako gaitasuna mugatzen du, baina, horrez gain, apetitua galtzea ere eragiten du. Erraz digeritzeko eta ekarpen energetiko handiko elikagaiak behar dira altueran. Jateko une hori erakargarriagoa eta eramangarriagoa izan dadin, Iñurrategi, Vallejo eta Zabalzaren taldeak Eneko Atxa sukaldariaren laguntza izango du oraingo honetan.

Azurmendi jatetxeko sukaldariak, Fagor Etxetresna Elektrikoen eskutik, erronka honetarako bereziki diseinatutako elikagai liofilizatuak sortu ditu. Hiru Michelin izarreko sukaldaritza zortzi mila metrora. Gazta, tomate, pesto eta oliba liofilizatuak bereziki goi-mendirako pentsatuak.

I+G eta ingurumenari loturiko alderdiak, espedizioaren osagai
Taldeak buzo berezi bat eramango du espedizio honetan, Ternua etxeko I+G lantaldeak bereziki diseinatutako ekipamendua. Zer duen berezia? Goi teknologia, material birziklatuak eta artisau erara landuta egotea. Teknologia goreneko ehunak eta luma birziklatu eta hidrofugoko betegarria dira ekipo horien osagaiak. Bi piezatakoa da altuerako buzo hau, Arrasaten (Gipuzkoa) bertan artisau erara egina; lumak eskuz betetzen dira, prozesua bera eta jantzien kalitatea kontrolatzeko. Erabateko artisautza prozesua eta ingurumenarekiko iraunkorra.