Lesioek kendu diote Elaia Torrontegiri Rioko Jokoetan parte hartzeko aukera
Elaia Torrontegi Basque Teameko taekwondistak badaki ez duela parte hartuko abuztuan Rio de Jaineron (Brasil) egingo diren hurrengo Olinpiar Jokoetan. Plentziako taekwondistak kalvario fisiko itzela jasan du azken urtean eta oztopo ikaragarri horrek bere olinpiar ametsa zapuztu du azkenean. Bere eskuin hankako abduktorean duen lesioagatik, ezin izan ditu ondo egin urtarrilean Turkian egingo den aurreolinpikorako puntuak ematen dituzten txapelketak eta torneoak.
Rio’16n parte hartzeko aukerarik gabe, maila goreneko lehiaketetan bi hamarkada baino gehiago eman ondoren, nola esango duen agur pentsatzen ari da Elaia “eliteko edozein kirolarik bezala maila altuenean lehiatzen esan nahiko nuke agur eta Europako Txapelketa amaiera bikaina izan daiteke”.
Dena den, berriro ere arazo fisikoek Elaia Torrontegiren asmoak lausotzen dituzte, kirolariak hiru hilabete baitaramatza entrenatu barik. Taekwondoko Europako Txapelketa maiatzan jokatuko dute Suitzan, baina horretara heltzeko aukera izateko lehenengo punbtuak lortu beharko ditu beste txapelketa batzuetan, otsailaren 20an jokatuko den Espainiako Txapelketan, esaterako. “Oraindik ez zait abduktoreko lesioa osatu eta zaila izango da garaiz iristea”, aitortu du.
Datorren astean Torrontegik beste azterketa mediku bat izango du eta horrek zehaztuko du, bai onerako ala bai txarrerako, bere etorkizun gertukoena.