azaroa
2015
Alberto Iñurrategi, Juan Vallejo eta Mikel Zabalza, etxean
Alberto Iñurrategi, Juan Vallejo eta Mikel Zabalza etxean daude jada. Urriaren 19an Chamlang mendiko gailurra egin zuten Nepalgo Himalayan. Japoniako espedizio batek 1986an zabaldutako bidea estilo alpinoan osatu dute Basque Teameko goi mendizaleek. Aitortu dute eginahala bertan behera uzteko zorian egon zirela eguraldi baldintza kaxkarrak, haize haundia, tarteko, baina jaisten hastekotan zeudela baldintzek hobera egin zuten eta gora ekiteko erabakia hartu zuten. Hala lortu zuten balentria, 7.319 metroan dagoen gailurrera iristea mendebaldeko isurialdetik. Ertz zorrotz eta ikusgarri bat lehenik, eta korridore babestu bat ostean, izan zituzten bide lerroak. Gailurrera iristearen pozak tentsioa ere ekarri zuen segidan, jaitsiera “tentsioz betea” izan zelako, batez ere ertz zorrotzean behera. Alberto Iñurrategik laburbildu du balorazioa: “espedizioak bete ditu gure espektatibak. Teknikoki, fisikoki eta konpromezu aldetik orekatua izan da. Oso gustura geratu gara, gogobeteta”.